ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ރަފީގު ވިދާޅުވީ، އެ ރިސޯޓު މިވަގުތު އޮތީ މޮނިޓަރިންގެ ހާލަތުގައި ކަމަށާއި ރަށަށް އަރާ ފޭބުން މަނާ ކުރެވިފައިވަނީ ކޮވިޑް-19 އަށް ހަތް މީހަކު ޕޮޒިޓިވް ވުމާއި ގުޅިގެންކަމަށެވެ.
އެގޮތުން އެ ރިސޯޓުން ވަނީ ދެ ޓުއަރިސްޓުންނާއި ފަސް ސްޓާފުން ކޮވިޑަށް ޕޮޒިޓިވް ވެފައެވެ. އޭގެތެރެއިން ދެ ޓުއަރިސްޓުންނާއި ތިން ސްޓާފުން ޓެސްޓްކުރެވިފައިވަނީ ބަލީގެ އަލާމަތްތަށް ހުރެގެންނެވެ. އަދި އިތުރު ދެ ސްޓާފުންނަކީ އެ މީހުންނާއި ކޮންޓެކްޓުވި މީހުންގެ ތެރެއިން ޓެސްޓް ކުރެވުނުއިރު ޕޮޒިޓިވްވި މީހުން ކަމަށް ޑރ.ނަޒްލާ ވިދާޅުވިއެވެ.
އެޗްޕީއޭއިން މިވަގުތު ދަނީ އެ ރަށުން ރެންޑަމް ސާޕްލަތަށް ނެގުމުގެ އިންތިޒާމްތައް ދ. އަތޮޅު ހޮސްޕިޓަލް އާއި އަދި ނިޔާމަ ރިސޯޓް އާއި ގުޅިގެން ހަމަޖައްސަމުނެވެ. އަދި މާދަމާ ރެންޑަމް ސާމްޕަލްތައް ނަގާ ޓެސްޓް ކުރުމުގެ ކަންތައްތައް ކުރިއަށް ގެންދާނެ ކަމަށް އެޗްޕީއޭއިން މައުލޫމާތު ދެއެވެ.
