ސީއެންއެމަށް ދެއްވި ހާއްސަ އިންޓަވިއު އެއްގައި އިމްރާން ވިދާޅުވީ ފުލުހުންގެ ގާނޫނަށް ގެނައި ބަދަލުތަކަކީ ރައްޔިތުންނާ ކައިރިން ރައްޔިތުންނަށް ފަސޭހަކޮށް ހިދުމަތް ދިނުމަށް މަގުފަހިކޮށްދޭ ބަދަލުތަކެއް ކަމަށެވެ.
އޭގެ އިތުރުން އަތޮޅު ތެރޭގައި ނެއިބަހުޑް ޕޮލިސިން ގާއިމް ކުރެވިގެން ދާނެކަން ފާހަގަކުރައްވާ އިމްރާން ވިދާޅުވީ ފުލުހުންގެ ގާނޫނަށް ގެނައި ބަދަލުތަކުގެ ސަބަބުން އަތޮޅުތަކުގެ ފުލުހުންގެ ހިދުމަތް ހަރުދަނާ ކުރެވޭނެ ކަމަށެވެ.
އެގޮތުން އެކި ސަރަހައްދުތަކުގައި ތިބޭ އިސް ކޮމާންޑަރުންގެ ލެވެލް މަތިކުރެވިފައިވާ ކުރެވުމަކީ އަތޮޅު ތެރޭގައި ފުލުހުންގެ ހިދުމަތް ހަރުދަނާ ކުރުމަށް ދީފައިވާ ބޮޑު އިސްކަމެއްގެ ގޮތުގައި އިމްރާން ފާހަގަކުރެއްވި އެވެ.
މަސައްކަތް ލާމަރުކަޒު ކުރުމުގެ ވިސްނުމަކީ ފުލުހުންގެ ގާނޫނުން ގެނެސްފައިވާ އެންމެ މުހިއްމު އެއް ކަންތައް ކަމަށާއި ގާނޫނަށް އަމަލުކުރަން ފެށުމާއެކު، ސަރަހައްދީ ކޮމާންޑަރުންނަށް ނިންމުންތައް ނިންމުމުގެ ބާރު ލިބި، މަސައްކަތް އަވަސްވެގެން ދާނެ ކަމަށް އިމްރާން ވިދާޅުވި އެވެ.
ދިވެހި ފުލުހުންގެ ހިދުމަތުގެ ބިލު ތަސްދީގު ކުރައްވާފައިވަނީ ޑިސެމްބަރު މަހު 27 ގައެވެ. އެގޮތުން މި ގާނޫނަށް އަމަލު ކުރުމަށް ނިންމާފައިވަނީ ގާނޫނު ގެޒެޓުގައި ޝާއިއު ކުރާތާ ތިން މަސް ހަމަވާ ތާރީހުން ފެށިގެނެވެ.
މި ގާނޫނަށް އަމަލު ކުރަން ފެށުމާއެކު ކުރިން އަމަލު ކުރަމުން އައި ފުލުހުންގެ ގާނޫނު އުވާލެވޭނެ އެވެ. އެހެންކަމުން މާޗް ފަހުކޮޅުގައި ކުރީގެ ގާނޫނު އުވިގެން ދާނެ އެވެ.
