ލާމަރުކަޒީ ގާނޫނަށް ގެނެސްފައިވާ މި އިސްލާހު ބާތިލުކުރުމަށް އެދި މި މައްސަލަ ކޯޓަށް ހުށަހަޅާފައިވަނީ ޖުމްހޫރީ ޕާޓީގެ ޒުވާނުންގެ ގޮފީގެ ކުރީގެ ރައީސް މޫސާ އަންވަރެވެ. 

މި މައްސަލައިގެ ހުކުމް އިއްވަން ހަމަޖައްސާ، ހައިކޯޓުން މޫސާ އަންވަރަށް ފޮނުވި ޗިޓުގައި، މި މައްސަލައިގެ ހުކުމް އިއްވުން ތާވަލު ކޮށްފައިވަނީ މިމަހު 24 ވާ އާދިއްތަ ދުވަހުގެ 13:45 ކަމަށް ބުނެފައިވެއެވެ. މި އަޑުއެހުން ކުރިއަށް ގެންދިއުމަށް ހަމަޖައްސާފައިވަނީ އޮންލައިންކޮށެވެ.

ލޯކަލް ކައުންސިލްތަކުގެ އިންތިހާބުގައި އަންހެނުންނަށް 33 އިންސައްތަ ހާއްސަ ކުރަން ލާމަރުކަޒީ ގާނޫނަށް އިސްލާހު ގެނެސްފައިވަނީ 2019 ވަނަ އަހަރުގައެވެ. މޫސާ އަންވަރު މި މައްސަލަ އެންމެ ފުރަތަމަ ހުށަހެޅި ސުޕްރީމް ކޯޓަށެވެ. ނަމަވެސް މި މައްސަލަ ފުރަތަމަ ބަލަން ޖެހޭނީ ހައި ކޯޓުން ކަމަށް ބުނެ މައްސަލަ ސުޕްރީމް ކޯޓުން ބޭރުކޮށްލުމުން ދެން މި މައްސަލަ ވަނީ ހައި ކޯޓަށް ހުށަހަޅާފައެވެ.

މި މައްސަލައިގެ ހައިކޯޓުގެ އަޑުއެހުންތައް ނިންމާލާފައިވަނީ މިދިޔަ އަހަރުގެ ނޮވެމްބަރު މަހުއެވެ.