ކޮވިޑް-19 ގެ ސަބަބުން ހިދުމަތް ހޯދުމަށް ގިނަ ބަދަލުތަކެއް ގެނެވުނު މި ދަތި އުނދަގޫ ދަނޑިވަޅުގައި ކަސްޓަމަރުންނަށް ލުއި ފަސޭހަކަމާއެކު ހިދުމަތް ހޯދުމަށް މަގުފަހި ކުރުމަށް ބީއެމްއެލް އިން ވަނީ ގިނަ މަސައްކަތްތަކެއް ކޮށްފައެވެ. މިގޮތުން، ކަސްޓަމަރުންނަށް ފޯރުކޮށްދޭ ގިނަ ހިދުމަތްތައް އޮންލައިންކޮށް އެދި ހުށަހެޅޭ ގޮތަށް ވަނީ ހަމަޖައްސާފައެވެ.
ބީއެމްއެލް އިން އިންޓަނެޓް ބޭންކިން މެދުވެރިކޮށް ފޯރުކޮށްދޭ އިތުރު އެކައުންޓް ހުޅުވުމާއި، ކްރެޑިޓް އަދި ޑެބިޓް ކާޑަށް އެދި ހުށަޅުމާއި، ލުއި ލޯނަށް އެދި ހުށަހެޅުމުގެ އިތުރުން މަލުލޫމާތު ފޯމު އަޕްޑޭޓް ކުރުމަށް 80،000 އަށް ވުރެ ގިނަ އެޕްލިކޭޝަން ވަނީ ހުށަހަޅާފައިވާ ކަމަށް އެ ބޭންކުން މިއަދު ބުންޏެވެ.
މިއީ މިދިޔަ އަހަރުގެ މާރިޗު މަހުން ފެށިގެން ޑިސެމްބަރު މަހުގެ ނިޔަލަށް ހުށަހެޅުނު އަދަދެވެ.
މިއީ 2019 ވަނަ އަހަރުގެ މި މުއްދަތާ އަޅާބަލާއިރު 33 ޕަސަންޓަށް ވުރެ އިތުރު އަދަދެކެވެ.
މީގެ އިތުރުން ހެލްތް ޕްރޮޓެކްޝަން އެޖެންސީ އިން ކަނޑައަޅާފައިވާ ގައިދުރުކަން ބެހެއްޓުމުގެ އުސޫލޫތަކާ އެއްގޮތްވާ ގޮތުގެ މަތިން ބްރާންޗްތަކުން ކިއުބީއެޕް ނަންބަރުތަކަށް ހިދުމަތް ދެމުންދާއިރު ސާވިސް ސެންޓަރުތަކުން ހިދުމަތް ދެމުންދާނީ އެޕޮއިންޓްމަންޓަށް ކަމަށް ވެސް އެ ބޭންކުން ބުނެއެވެ.
ކޮވިޑް-19 ފެތުރެން ފެށި ފަހުން، އޮންލައިން ހިދުމަތްތައް ބޭނުން ކުރާ ވަރު އިތުރުވެ، މިހާރު ބޭންކުގެ 90 ޕަސެންޓަށް ވުރެ ގިނަ ކަސްޓަމަރުން އިންޓަނެޓް ބޭންކިންގެ ހިދުމަތްތައް ބޭނުންކުރާ ކަމަށް އެ ބޭންކުން ބުނެއެވެ.