ޑިފެންސް މިނިސްޓްރީން ކޮންމެ ހަފްތާއަކު އާންމުކުރާ "މިނިސްޓަރުގެ ގަލަންކޮޅުން'' ގައި މިނިސްޓަރު މާރިޔާ ވިދާޅުވީ، ދިވެހި ސިފައިންނަކީ އިހްތިރާމާއެކު ހިނިތުންވެހުރެ ގައުމު އަމާން އައްސޭރިއަކަށް ގެންދިއުމުގެ ދިފާއީ އައްޑަނަ ކަމަށާއި ޒަމާނީ ގޮތުން ދުނިޔެއަށް އަންނަ ތަރައްގީއާއެކު ދިވެހި އަސްކަރިއްޔާ ތަރައްގީ ކުރުމަށް އަސްކަރީ ގޮތުން ކުރިއަރާފައިވާ ގައުމުތަކާއެކު ބާއްވާ ގުޅުންތައް އިތުރަށް މިއަދު ވަނީ ބަދަހިކޮށްފައި ކަމަށެވެ.
މިނިސްޓަރު މާރިޔާ ވިދާޅުވީ، ގައުމުތަކާއެކު ގުޅުން ބަދަހިވުމުން ދިވެހި އަސްކަރިއްޔާގެ ކުރިއެރުމަށް މުޅިން އާތަޖުރިބާތަކެއް ދަނީ ފަހިވެ ފައްކާވަމުން ކަމަށެވެ. އެގޮތުން ތައުލީމާއި ތަމްރީނުގެ ފުރުސަތުތައް އަސްކަރީ ބޮޑެތި ގައުމުތަކުން ދިވެހި ސިފައިންނަށް ހޯދައިދިނުމަށް ގިނަ މަސައްކަތްތަކެއް މިހާރު ވެސް ސަރުކާރުން ދަނީ ކުރަމުންކަން މާރިޔާ ފާހަގަކުރެއްވިއެވެ.
މިއަދު ދިވެހިރާއްޖޭގެ ދިފާއީ މައި ތަނބު ކަމަށްވާ ދިވެހި ސިފައިންގެ އަމާޒަކީ ރައީސް އަދި ސިފައިންގެ އެންމެ މަތީ ވެރިޔާ އިބްރާހީމް މުހައްމަދު ސޯލިހް ދިވެހި ގައުމީ ދިފާއީ ބާރާ މެދު ގެންގުޅުއްވާ ދުރުވިސްނުމާއި ވަރުގަދަ ތަސައްވުރު ހަގީގަތަކަށް ހެދުން ކަމަށް މިނިސްޓަރު މާރިޔާ ވިދާޅުވިއެވެ.
މިނިސްޓަރު މާރިޔާ ވިދާޅުވީ، ކުރިއާ ހިލާފަށް "ހައިބްރިޑް ތްރެޓްސް"ގެ ނުރައްކާ ބޮޑުވެފައިވާ މި ޒަމާނުގައި ރައްކާތެރިކަމުގެ ފިޔަވަޅުތައް އެޅުމުގައި ވީހާވެސް ބޮޑަށް ގައުމުތަކާ ގުޅިގެން މަސައްކަތް ކުރުމުގެ ގާބިލްކަން ދިވެހި އަސްކަރިއްޔާއިން ފެންނަމުންދާކަން މިއަދު ރައްޔިތުން ބަލައި ގަންނަނީ ނުހަނު އުފަލާއެކު ކަމަށެވެ.
