ރައްޔިތުންގެ މަޖިލީހުގައި އަންގާރަ ދުވަހު ރައީސް ނަޝީދާ ބައްދަލުކުރުމަށް ފަހު ކުރި ޓްވީޓްތަކެއްގައި މާޔަންވަނީ ބައިނަލް އަގްވާމީ އަދި ގައުމީ ކުޅިވަރު ހަރަކާތްތަކުގެ ތެރޭގައި އޮތް ކޮރަޕްޝަނާ އަދި ތަފާތުކުރުންތަކުގެ ވާހަކަ މަޖިލީހުގެ ރައީސާ ހިއްސާ ކުރިކަމަށް ބުނެފައެވެ. އަދި އެކަން ކަމުގައި ރައީސް ނަޝީދުގެ ފަރާތުން ދެއްވާ ތަރުހީބަށް މާޔަން ޝުކުރު އަދާކޮށްފައިވެއެވެ.
މާޔަންވަނީ އޭއެފްސީގެ އިންތިޚާބުގައި ހިނގައިދިޔަ ކަންކަން ސްޕޯޓްސް ކޯޓް އޮފް އާބިޓްރޭޝަނަށް ހުށަހަޅައި، އެ މައްސަލަ ކާމިޔާބުކޮށްފައެވެ. މާޔަން ހުށަހަޅާފައިވަނީ ދެހާސް ނަވާރަވަނަ އަހަރު އޮތް އޭއެފްސީ އެކްސްކޯގެ ސައުތު ގޮނޑިއަށް މާޔަންއާ ވާދަކުރި ބަންގްލަދޭޝްގެ މަހްފޫޒާ އަޚްތަރު ކިރަންއަށް އެ އިންތިހާބު ކާމިޔާބުކޮށްދޭން، އޮލިމްޕިކް ކައުންސިލް އޮފް އޭޝިއާގެ ރައީސް ކުވޭތުގެ އަހުމަދު އަލް-ސަބާހް ނުފޫޒު ފޯރުއްވި މައްސަލައެވެ.
