އޭއެފްސީ ކަޕުގެ ގްރޫޕް ސްޓޭޖުގެ މެޗުތައް ހޯސްޓްކުރަން އަވައްޓެރި އިންޑިއާއިން ޝައުގުވެރިކަން ފާޅުކުރިކަން މީޑީއާއިން އެންމެ ފުރަތަމަ ރިޕޯޓްކޮށްފައިވަނީ މި ހަފުތާ ތެރޭގައެވެ. އޭއެފްސީ ކަޕުގެ އިތުރުން އޭއެފްސީ ޗެމްޕިއަންސް ލީގުގައި އިންޑިޔާގެ ގޯއާ އެފްސީ ހިމެނޭ ގްރޫޕުގެ މެޗުތައް ހޯސްޓް ކުރަންވެސް އޯލް އިންޑިއާ ފުޓްބޯޅަ ފެޑެރޭޝަނުންވަނީ ޝައުގުވެރިކަން ފާޅުކޮށްފައެވެ.
ކޮވިޑާ ގުޅިގެން އަޅާފައިވާ ރައްކާތެރިކަމުގެ ފިޔަވަޅުތަކުގެ ތެރެއިން އޭއެފްސީ ކަޕުގެ މެޗުތައް އެއް ސްޓޭޑިއަމެއްގައި ކުރިއަށް ގެންދިޔުމަށް އޭއެފްސީން ނިންމާފައިވާއިރު، އިންޑިޔާގެ ކަލްކަތާއަކީ ބުނެވޭ ގޮތުގައި އިންޑިޔާގެ ކުޅިވަރުގެ ހިތެވެ. ކުރިކެޓްގެ ފޯރި ގަދަ އިންޑިޔާގައި، ކަލްކަތާއަކީ ކުރިކެޓޭ އެއްވަރަށް ފުޓްބޯޅައިގެ ފޯރިވެސް ގަދަ ސަރަހައްދެކެވެ. އޭއެފްސީ ކަޕުގެ ގްރޫޕް ސްޓޭޖުން ރާއްޖޭން ޖާގަ ހޯދާފައިވާ މާޒިޔާއިންވަނީ މީގެ ކުރިން ކަލްކަތާގައި މޯހަން ބަގާން ބަލިކޮށްފައެވެ. މި އަހަރުގެ އޭއެފްސީ ކަޕުގައި އިންޑީޔާއިން ވާދަކުރާނީ އޭޓީކޭ މޯހަން ބަގާންއެވެ. މީގެ އިތުރުން ޕްލޭ އޮފްގައި ބެންގަލޫރު އެފްސީން ވާދަކުރާނެއެވެ. ރާއްޖޭން މި ގްރޫޕުގައި ހިމެނެނީ މާޒިޔާއެވެ. ޕްލޭ އޮފްގައި ރާއްޖޭން ވާދަކުރާނީ އީގަލްސްއެވެ.
އަށްޑިހަ ފަސް ހާސް މީހުންގެ ޖާގައިގެ ސޯލްޓް ލޭކް ސްޓޭޑިއަމްގައި އޭއެފްސީ ކަޕުގެ ސައުތު ގްރޫޕުގެ މެޗުތައް ހޯސްޓް ކުރަން އިންޑިޔާއިން ހުށަހަޅާފައިވާއިރު، ފަސް ޓްރެއިނިންގ ގްރައުންޑްވެސް ކަނޑައަޅާފައިވާ ކަމަށް މީޑިއާ ރިޕޯޓްތައް ބުނެއެވެ. އިންޑިޔާގެ ވިސްނުން ހުރީ ގްރޫޕް ސްޓޭޖުގައި ވާދަކުރާ ކޮންމެ ޓީމަކަށް ވަކި ޓްރެއިނިން ގްރައުންޑެއް ހާއްސަ ކުރާށެވެ.
އޭއެފްސީ ކަޕުގެ ގްރޫޕް ސްޓޭޖުގެ މެޗުތައް ސެންޓްރަލައިޒްޑް ވެނިއުއެއްގައި ކުރިއަށް ގެންދަން އޭއެފްސީން މިދިޔަ އަހަރުވެސް ނިންމިއެވެ. އެހެންނަމަ ވެސް ކޮވިޑުގެ ހާލަތު ގޯހުން ގޯހަށް ގޮސް އެންމެ ފަހުން މުބާރާތް ކެންސަލް ކުރީއެވެ.
މިދިޔަ އަހަރު ސެންޓްރަލައިޒްޑް ވެނިއުއެއްގައި މުބާރާތް ކުރިއަށް ގެންދަން އޭއެފްސީން ނިންމުމުން މުބާރާތް ހޯސްޓް ކުރަން ހުށަހެޅީ ރާއްޖޭން އެކަންޏެވެ. ރާއްޖެ ފިޔަވައި އެހެން އެއްވެސް ގައުމަކުން މުބާރާތް ހޯސްޓް ކުރަން ޝައުގުވެރިކަން ފާޅުނުކުރުމުން މިދިޔަ އަހަރު ރާއްޖެއަށް އެ ފުރުސަތު އޭއެފްސީން ދިނެވެ. މި އަހަރުގެ އޭއެފްސީ ކަޕުގެ މެޗުތައް ރާއްޖޭގައި ހޯސްޓް ކުރަން މަސައްކަތް ކުރުމުގެ ވިސްނުމެއް ހުރި ކަމަކަށް މިހާތަނަށް އެފްއޭއެމަކުން އަދި ހާމަކޮށްފައެއް ނުވެއެވެ.
އޭއެފްސީ ކަޕުގެ ގްރޫޕް ސްޓޭޖުގެ ކުޅުން ފެށޭނީ އަންނަ މެއި މަހުއެވެ. ޕްރިމިލިނަރީ ބުރުގެ މެޗުތައް އަންނަ އޭޕްރީލް މަހު ފެށޭނެއެވެ. ޕްރިމިލިނަރީ ބުރުގައި ރާއްޖޭން ވާދަކުރާނީ ކްލަބު އީގަލްސްއެވެ. އިންޑިޔާއިން ވާދަކުރާނީ ބެންގަލޫރު އެފްސީއެވެ.