އެޗްޑީސީން ބުނެފައިވަނީ، މި މަސައްކަތަކީ ހުޅުމާލޭ ދެވަނަ ފިޔަވަހީގެ ހިޔާ ފްލެޓްތަކުގައި މީހުން ދިރިއުޅެން ފެށުމުގެ ކުރިން، އެ ސަރަހައްދުގައި ތަފާތު ގިނަ ހިދުމަތްތަކެއް ގާއިމުކުރުމަށްޓަކައި އެ ކޯޕަރޭޝަނުން ކުރަމުންދާ މަސައްކަތްތަކުގެ ތެރެއިން ވަރަށް ބޮޑު އަހައްމިއްޔަތު ކަމެއް ދީގެން ކޮށްފައިވާ މަސައްކަތެއް ކަމަށެވެ. އަދި އޯޕަން އެކްސެސް ނެޓްވޯކަކީ ހުޅުމާލޭ ސްމާޓް ސިޓީ ޕްރިޖެކްޓުގެ ބިންގާ ކަމަށްވެސް ވަނީ ބުނެފައެވެ.
އެޗްޑީސީން މައުލޫމާތުދޭ ގޮތުގައި މި ޕްރޮޖެކްޓުގެ ބިޒްނަސް މޮޑެލްގައި މުޅި ހުޅުމާލޭގެ ދެވަނަ ފިޔަވަހީގެ ހުރިހާ އިމާރާތްތައް މުވާސަލާތީ ވިއުގައަކުން ގުޅައިލުމަށްޓަކައި، މައިގަނޑު 1 އިންފްރާސްޓްރަކްޗާއެއް ގާއިމު ކުރެވިގެންދާނެއެވެ. އަދި މި އިންފްރާސްޓްރަކްޗާގައި އެކުލެވޭ ފައިބާ ވިއުގަ މެދުވެރިކޮށް، ހުޅުމާލޭގައި މުވާސަލާތީ ހިދުމަތް ފޯރުކޮށްދޭ ފަރާތްތަކަށް ލުއިފަސޭހަ ގޮތެއްގައި ހިދުމަތް ފޯރުކޮށްދެވޭނެ ކަމަށާއި އަދި، ހުޅުމާލެ ދެވަނަ ފިޔަވަހީގައި ދިރިއުޅޭ ރައްޔިތުންނަށްވެސް މިކަމުގެ ސަބަބުން ގިނަ ފައިދާތަކެއް ލިބިގެންދާނެ ކަމަށްވެސް މައުލޫމާތުދެއެވެ.
އެގޮތުން މި ޕްރޮޖެކްޓަކީ ގިގަބައިޓް ޕެސިވް އޮޕްޓިކަލް ނެޓްވޯކް (ޖީޕޯން) ސަޕޯޓު ކުރާ ވިއުގައަކަށްވުމުން، މުވާސަލާތީ ހިދުމަތް ދެއްވާ ފަރާތްތަކުގެ މަސައްކަތަށް އެކަމުގެ ސަބަބުން އިންގިލާބީ ބަދަލެއް އައިސް، ހިދުމަތްތައް އާ ހަރުފަތްތަކަށް ވާސިލުކޮށްދޭނެ ކަމަށް އެޗްޑީސީން ބުނެއެވެ.
އަދި އާއްމުކޮށް ދެވޭ ހިދުމަތްތައް ލިބޭނެކަން ކަށަވަރުކޮށްދިނުމަށް އެޗްޑީސީން، ޕީ.އެސް.އެމް އާއި މީޑިއާނެޓާއި ދެމެދު އެއްބަސްވުމެއްގައި ސޮއިކޮށްފައިވާ ކަމަށްވެސް އެޗްޑީސީން ވަނީ ބުނެފައެވެ.
