އެޗްއީއޯސީން ރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ފާތިމަތު ނަޒްލާ ރަފީގް ވިދާޅުވީ މިހާރު ފުވައްމުލައް ސިޓީގައި ޕޮޒިޓިވްވެފައިވާ ކޭސްތަކާ ގުޅުމެއް ނެތް ކޭސްތަކެއް ފެނިފައިވާ ކަމަށެވެ. އަދި އެ އާ ކުލަސްޓާގައި ފުރަތަމަ މީހާ ޕޮޒިޓިވްވެފައި ވަނީ ހޮނިހިރު ދުވަހު ކަމަށާއި އަދި އެކޭސްއާ ގުޅުންހުރި އިތުރު ހަ މީހަކު މިހާރު ޕޮޒިޓިވްވެފައިވާ ކަމަށެވެ.
ފުވައްމުލައް ސިޓީގެ އިތުރުން މިވަގުތު އައްޑޫ ސިޓީ ހުޅުމީދޫގައި އޮތް ކްލަސްޓާއަކުން ވެސް އިތުރު 2 މީހަކު ޕޮޒިޓިވްވެފައިވާ ކަމަށާއި މިއީ އެއް އާއިލާއަކަށް ނިސްބަތްވާ ދެމީހުންކަމަށް ޑރ. ނަޒްލާ ވިދާޅުވިއެވެ. އަދި މިހާރު ރާއްޖޭގައި މޮނިޓަރިންގެ ހާލަތުގައި އޮތީ ތިން ރަށެއް ކަމަށާއި އެއީ އައްޑޫ، ފުވައްމުލަކު އަދި ކޮޅުފުށި ކަމަށް ވެސް ޑރ. ނަޒްލާ ވިދާޅުވި އެވެ.
ރާއްޖޭގައި ކޮވިޑް-19 ގެ ކޭސްތައް ދަނީ އިތުރު ވަމުންނެވެ. އެގޮތުން އިއްޔެ ވަނީ 157 މީހުން ކޮވިޑް-19 އަށް ޕޮޒިޓިވެފަ އެވެ. އެއީ މާލޭ ސަރަހައްދުން 103 މީހުންނާއި އަތޮޅުތަކުން 20 މީހަކާއި ރިސޯޓުތަކުން ޕޮޒިޓިވްވި 34 މީހެކެވެ.