މިކަމުގެ މައުލޫމާތު ސީއެންއެމްއާއި ހިއްސާކުރައްވަމުން އީސީގެ ރައީސް އަހަމަދު ޝަރީފް ވިދާޅުވީ، އީސީން އެ މައްސަލަ ސްޕްރީމް ކޯޓަށް ހުށަހެޅީ، މީގެ ކުރިން ކަނޑޫދޫ ކައުންސިލްގެ ރައީސް ކަމަށް ވާދަ ކުރާ ހަސަން މޫސާގެ ކެންޑިޑެސީ ޝަރުތު ހަމަނުވާތީ ބާތިލުކޮށްފައިވަނިކޮށް، އޭނާގެ ފަރާތުން އެ މައްސަލަ އިސްތިއުނާފުކުރުމުން ސްޕްރީމް ކޯޓުން ހަސަން މޫސާއަށް ކައުންސިލް އިންތިހާބުގައި ވާދަ ކުރެވޭނެ ކަމަށް ނިންމުމާއި ގުޅިގެން ކަމަށެވެ. 

ސްޕްރީމް ކޯޓުން އެގޮތަށް ނިންމާފައިވަނީ، އިންތިހާބަށް ކުރިމަތިލާ ކެންޑިޑޭޓެއްގެ ކެންޑިޑެސީ ބަލައިގަތުމަށްފަހު ގާނޫނުގައި އޮންނަ ތާރީހު ފަހަނައަޅާ ދިޔުމަށްފަހު، އެ ކެންޑިޑޭޓްގެ ކެންޑިޑެސީ ބާތިލުކުރުމުގެ ބާރު އިލެކްޝަން ކޮމިޝަނަށް ލިބިގެން ނުވާތީ އެވެ. އޭނާގެ ކެންޑިޑެސީ ސައްހަތޯ ނުވަތަ ނޫންތޯ ގާނޫނު ބުނާގޮތުން ނިންމަންޖެހޭނީ ކޯޓު މެދުވެރިކޮށެވެ. 

އިލެކްޝަން ކޮމިޝަނުން ހަސަންގެ ކެންޑިޑެސީ ބާތިލުކޮށްފައިވަނީ، އިންތިހާބަށް ކުރިމަތިލިއިރު ސާބިތު ދަރަންޏެއް އޮވެމެ ފޯމުގައި ދަރަނި ހަލާސްކޮށްފައިވާ ކަމަށް ބުނެ ދޮގު މައުލޫމާތު ހިމަނާފައިވާތީ އިންތިހާބުގެ ގާނޫނުގެ 12 ވަނަ މާއްދާގެ (ހ) ގެ (7) ވަނަ ނަންބަރުގައި ބަޔާންކުރާ، އިންތިހާބަށް ކުރިމަތިލާ މީހުންގެ ކިބައިގައި ފުރިހަމަވާންޖެހޭ ޝަރުތު، އޭނާގެ ކިބައިގައި ފުރިހަމަނުވާކަން، ސާބިތުވާ ކަމަށް ބުނެ މިދިޔަ މަހުގެ 13 ވަނަ ދުވަހު އެވެ.  

އެހެންނަމަވެސް ގާނޫނު ބުނާގޮތުން ކެންޑިޑޭޓެއްގެ އިންތިހާބީ ފޯމު ބަލައިގަތުމަށްފަހު ގާނޫނުގައި ބުނާ ތާރީހުގެ ފަހަުން ކެންޑިޑޭޓެއްގެ އެފަދަ މައްސަލައެއް ފެންމަތިވެގެން ވިޔަސް އޭނާގެ ކެންޑިޑެސީ ބާތިލުކުރެވޭނީ ސްޕްރީމް ކޯޓަށް އެކަންޏެވެ. އެހެންކަމުން ސްޕްރީމް ކޯޓުން މިމަހުގެ 23 ވަނަ ދުވަހުގެ ނެރުނު ހުކުމްގައި ވަނީ ހަސަން މޫސާއަށް އިންތިހާބުގައި ވާދަކުރެވޭނެ ކަމަށެވެ.  

ޝަރީފް ސީއެންއެމްއަށް ވިދާޅުވީ، އެހެންނަމަވެސް ހަސަން މޫސާގެ ކެންޑިޑެސީ އީސީން ގަބޫލްކުރިއިރު އޭނާގެ ސާބިތު ދަރަންޏެއް އޮތްކަން ލިޔެކިޔުމުން ފެންނަން އެބަހުރި ކަމަށާއި އެ މައްސަލަ އަނެއްކާވެެސް ސްޕްރީމް ކޯޓަށް އީސީގެ ފަރާތުން ހުށަހަޅާފައިވަނީ އެހެންވެ ކަމަށެވެ. 

ޝަރީފް ވިދާޅުވީ، އީސީން އެ މައްސަލާގައި ގޮތެއް ނިންމުމުގެ ކުރިން އެންމެ ފުރަތަމަ ސްޕްރީމް ކޯޓަށް އެ މައްސަލަ ހުށަހެޅި ކަމަށެވެ. ނަމަވެސް އޭރު އެ މައްސަލާގައި ރަޖިސްޓްރާ ނިންމާފައިވަނީ އެއީ ސްޕްރީމް ކޯޓުން ބެލޭނެ މައްސަލައެއް ނޫންކަމަށް ކަމަށެވެ. އެ މައްސަލާގައި އިލެކްޝަން ކޮމިޝަނުން ގޮތެއް ނިންމާ ކެންޑިޑެސީ ބާތިލުކުރީ އެހެންވެ ކަމަށް ޝަރީޕް ވިދާޅުވިއެވެ.  

ކަނޑޫދޫ ކައުންސިލްގެ ރައީސްކަމަށް ދެ ކެންޑިޑޭޓަކު ކުރިމަތިލާފައިވެ އެވެ. އެއީ ޕީޕީއެމްގެ ފަރާތުން ކުރިމަތިލި ހަސަން މޫސާ އާއި އެމްޑީޕީގެ ފަރާތުން ކުރިމަތިލި އަހްމަދު ރީހާން އެެވެ. އެހެންނަމަވެސް އީސީން ހަސަން މޫސާގެ ކެންޑިޑެސީ ބާތިލްކުރުމާއެކު ކަނޑޫދޫ ކައުންސިލްގެ ރައީސްކަމަށް ދެވަނައަށް ކުރިމަތިލި އެމްޑީޕީގެ ކެންޑިޑޭޓް ރީހާންއަށް އެ ގޮނޑި ވަނީ ޔަގީންވެފަ އެވެ.

ޝަރުތު ހަމަނުވާކަމަށް ބުނެ ޕިޕީއެމް، ކެންޑިޑޭޓެއްގެ ކެންޑިޑެސީ ބާތިލުކޮށްފައިވާއިރު ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީއަށް ކުރިމަތިލާފައިވާ ކެންޑިޑޭޓުންގެ ތެރެއިން ބައެއް މެންބަރުން ނަން އަނބުރާ ގެންގޮސްފައިވާތީ ވޯޓަކާއި ނުލާ 120 މެންބަރަކަށް މިހާރުވަނީ ގޮނޑި ޔަގީންވެފަ އެވެ. މީގެ ތެރެގައި ގިނައީ ސަރުކާރު ތަމްސީލު ކުރާ އެމްޑީޕީގެ ކެނޑިޑޭޓުންނެވެ.

އަންނަ އޭޕްރީލް މަހުގެ ދިހަ ވަނަ ދުވަހު ބާއްވަން ނިންމާފައިވާ ކައުންސިލް އިންތިހާބަށް 2264 ކެންޑިޑޭޓުން ކުރިމަތިލާފައިވާއިރު، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް 1670 ކެނޑިޑޭޓުން ވަނީ ކުރިމަތިލާފައެވެ. އަދި މި އިންތިހާބުގައި ޖުމުލަ 3934 ކެނޑިޑޭޓުން އިންތިހާބު ކުރާނެއެވެ.