ރަށްވެހި ފަތިސް ކެމްޕެއިން ލޯންޗުކުރުމަށް ރޭ އެމްޑީޕީން ބޭއްވި ޖަލްސާގައި ވާހަކަ ދައްކަވަމުން، ރައީސް ނަޝީދު ވަނީ އެމަނިކުފާނުގެ މުޅި ސިޔާސީ ހަޔާތުގައި ދެއްކި އެއް ވާހަކައަކީ ބޯހިޔާވަހިކަމުގެ ވާހަކަ ކަމަށާއި ދެން ވެސް އަދި ކުރިއަށް އޮތް ތަނުގައި ވެސް އެ ވާހަކަ ހުއްޓާނުލާއި ދައްކާނެ ކަމަށެވެ.
މި ރާއްޖޭގެ ރައްޔިތުންނަށް ބޯހިޔާވަހިކަން ކަށަވަރުވާންޖެހޭނެ ކަމަށާއި އެގޮތުން އެމްޑީޕީން ސިޔާސީ މަސައްކަތުގައި ދެމި ތިބޭނަމަ ބޯހިޔާވަހިކަމަކީ ރާއްޖޭގެ ރައްޔިތުންނަށް ދަރާފައިވާ ބޮޑު ދަރަންޏެއް ކަމަށެވެ.
ރައީސް ނަޝީދު ވިދާޅުވީ ސިޔާސީ ހަޔާތުގައި ބިނާވެފައި އޮންނާނީ ބޯހިޔާވަހިކަމާއި ގުޅިގެން ރައްޔިތުންނަށްވި ވައުދު ހަގީގަތަކަށް ހެދުމަށް ކަމަށެވެ. އެގޮތުން އެކަމުގައި ރައީސް އިބްރާހީމް މުހައްމަދު ސޯލިހަށް އިތުބާރުކުރައްވާ ކަމަށް ވިދާޅުވި އެވެ.
އޭގެ އިތުރުން ރައީސް ނަޝީދު ވިދާޅުވީ އިންތިޒާމުވެގެން ރާއްޖޭގެ ރައްޔިތުންނަށް މިހާތަނަށް ބޯހިޔާވަހިކަން ލިބިފައި ވަނީ އެމަނިކުފާނު ކުރެއްވި މަސައްކަތުން ކަމަށެވެ. އެގޮތުން ރައްޔިތުން ވަދެގެން މިހާރު އުޅޭ ފްލެޓްތަކަކީ އެމްޑީޕީގެ ނިޒާމުން، ކޮންޓްރެކްޓުން އަޅާފައިވާ ފްލެޓްތަކުގައި ކަމަށެވެ. އަދި ރައީސް ޔާމީންގެ މުޅި ފަސް އަހަރު ހޭދަވީ ފްލެޓް އެޅުމުގައި ނޫންކަން ފާހަގަކުރައްވާ ވިދާޅުވީ، ޔާމީންގެ ސަރުކާރުގައި ވަނީ އެ ކޮންޓްރެކްޓާ އެއްގޮތަށް ފްލެޓްތަކަށް މީހުން ވައްދާފައި ކަމަށެވެ.
އޭގެ އިތުރުން ކައުންސިލަށް ފްލެޓް އެޅުމުގެ ޖާގަ ގާނޫނުން ތަންދޭކަން ފާހަގަކުރައްވާ ނަޝީދު ވިދާޅުވީ އެހެންކަމުން، އެކަން ނުކޮށް ދެއްކޭނެ ހުއްޖަތެއް ވެސް ނެތް ކަމަށެވެ.، އެ ބާރުތަކާއެކު އެމްޑީޕީގެ މެމްބަރުން ނިކުމެ، އެކަންކަން ހަގީގަތަކަށް ހަދައިދޭނެ ކަމަށް ނަޝީދު ވިދާޅުވި އެވެ.
