ތިރީގައި އެ ވަނީ އަވަހަށް ނަތީޖާއަށް ވާސިލްވާން ބޭނުން ނަމަ އާދަކޮށް ކުރަންވީ 10 ކަމެކެވެ. 

1. ހެނދުނު ނާސްތާ ކެއުން: ހެނދުނު ނުކައިފި ނަމަ ބަރުދަން ލުއިވުމަށް އެހީއަކަށް ވުމުގެ ބަދަލުގައި ފަހުން ބަނޑުހައިވެ އެއް ފަހަރާ މާ ގިނައިން ކެވޭ ގޮތް ދިމާވެ އެވެ. 

2. ގަވާއިދުން ގަޑިން ގަޑިއަށް ކެއުން: ގަޑިން ގަޑިއަށް ކޮންމެ ދުވަހަކު ވެސް ކެއުމުން ކެލޮރީޒް ދުއްވާލަން ހަށިގަނޑު ވެސް އާދަވެ އެވެ. އޭގެ އިތުރުން ކާ ގަޑިތަކުގައި ގަވާއިދުން ކާ ނަމަ ބޭކާރު އެއްޗެހި ކެއުމާ ދުރުކޮށްދޭނެ އެވެ.

3. ގިނައިން މޭވާ އާއި ތަރުކާރީ ކެއުން: މިއީ ކެލޮރީޒް އަދި ފެޓް މަދު، ފައިބާ ގިނަ ތަކެއްޗެވެ. މި ތިން ކަމަކީ އަވަހަށް ބަރުދަން ލުއި ކުރުމަށް އެންމެ މުހިއްމު ތިން ކަމެވެ. 

4. ހަރަކާތްތެރިވެ އުޅުން: ދުވަހުގެ ވަގުތުތަކުގައި ހަރަކާތްތެރިވެ އުޅުމަކީ ބަރުދަން އަވަހަށް ދުއްވާލުމަށް ފަހު އެއްވަރެއްގައި ހިފެހެއްޓުމަށް މުހިއްމު ކަމެކެވެ. 

5. ގިނައިން ފެން ބުއިން: ބައެއް ފަހުން ފެން ބޮވައިގަތުމުން ބަނޑުހައިވީ ކަމަށް މީހުންނަށް ހީވެ އެވެ. އެހެންވެ ގިނައިން ފެން ބޯން ޖެހެ އެވެ. 

6. ފައިބާ ގިނަ އެއްޗެހި ކެއުން: ފައިބާ ގިނަ އެއްޗެހި ކެއުމުން ގިނަ ވަގުތު ބަނޑުފުރިފައި ހުންނަހެން ހީވާނެ އެވެ. ފައިބާ ގިނަ ތަކެތީގެ ތެރޭގައި ފެހި ފަތް އަދި މޭވާ އާއި ތަރުކާރީ ހިމެނެ އެވެ.

7. ކާ އެއްޗެތީހެ ތަފްސީލް ހޯދުން: ކާ އެއްޗެހި ގަންނައިރު، އެއާ ގުޅޭ ކެލޮރީޒްގެ މައުލޫމާތާއި އޭގެން ލިބޭ ފައިދާގެ ތަފްސީލް ހޯދާށެވެ. އޭރުން ހަށިގަނޑަށް ލިބޭ ކެލޮރީޒްގެ މިންވަރު އަމިއްލައަށް ވެސް އެނގޭނެ އެވެ.

8. ކުޑަ ތައްޓެއްގައި ކެއުން: ތަށި ކުޑަވުމުން ޕޯޝަން ކުޑަ ކުރަން އެހީވެ އެވެ. އޭގެ އިތުރުން މަޑުމަޑުން ކާށެވެ. ދިރާސާއިން އެނގޭ ގޮތުގައި ބަނޑު ފުރުމުން އެކަން ސިކުނޑިއަށް ނަގައިގަނެވެނީ ބަނޑު ފުރޭތާ 20 މިނެޓު ފަހުންނެވެ. 

9. ބައެއް އެއްޗެހި ކެއުން މަނާ ނުކުރުން: މިގޮތަށް ހެދުމުން އެ ތަކެތި ކާހިތްވުން އިތުރުވެ، ޑަޔަޓުގައި ދެމިހުންނަން އުނދަގޫވެ އެވެ.

10. ބޭކާރު ކާއެއްޗެހި ގަނެފައި ނުބެހެއްޓުން: ޗޮކުލެޓާއި ބިސްކޯދު، އަދި ޗިޕްސް ފަދަ އެއްޗެހި ގޭގައި ނުބަހައްޓާށެވެ. އެ ތަކެތި ހުރުމުން ކާހިތްވުން އިތުރުވާނެ އެވެ.