މާލޭ ސަރަހައްދުގައި ވެކްސިންޖެހުމަށް ހާއްސަކޮށްފައިވާ މަރުކަޒުތަކުގެ ތެރޭގައި އިސްލާމިކް ސެންޓަރު ހިމެނެއެވެ. އަދި ކޮންމެ ދުވަހަކުވެސް އެ ސަރަހައްދަށް އެތަށް ބަޔަކު ވެކްސިން ޖެހުމަށް ޖަމާވެއެވެ. މާލެ ސަރަހައްދުގައި ކޮވިޑް-19 ވެކްސިންގެ ފުރަތަމަ ޑޯޒު ދިނުން ކުރިއަށް ގެންދަން ނިންމާފައިވަނީ މިމަހުގެ 15 ގެ ނިޔަލަށް ކަމަށް އެޗްޕީއޭއިން އިއުލާން ކުރުމާއި ގުޅިގެން މިއަދުވެސް ވަނީ ވެކްސިން ޖެހުމަށް އެ ގިނަ ބަޔަކު ވެކްސިން މަރުކަޒްތަަކަށް ޖަމާވެފައެވެ. އެގޮތުން އިސްލާމީ މަރުކަޒަށްވެސް މިއަދުވަނީ ގިނަ ބަޔަކު ވެކްސިން ޖެހުމަށްޓަަކައި ޖަމާވެ ސަފްހަދާފައެވެ.
މި މަންޒަރު ފެންނަ ފޮޓޯއަކާއިއެކު ޑރ. އިޔާޒް ކުރެއްވި ޓްވީޓެއްގައި ވަނީ ވެކްސިންޖެހުމަށް މިސްކިތުގައި ގައިދުރުކަމެއްނެތި ސަފުހެދޭއިރު، ނަމާދަށް އަރަންވީމަ ގައިދުރުކުރަންޖެހޭތީ ކަންބޮޑުވުން ފާޅުކޮށް އެކަމާއިމެދު ސުވާލު އުފައްދާފައެވެ. އެގޮތުން އިޔާޒް ވިދާޅުވީ، ވެކްސިންޖެހުމަށް އެއްވެފައިވާ މީހުން އެގޮތަށް ތިބެފައި ނަމާދަށް އަރައިފިނަމަ ތިން ފޫޓަށް ދުރަށް ޖެހެންޖެހޭ ކަމަށެވެ. އަދި އެއީ ހަމަޖެހޭ އުސޫލެއްތޯ ޑރ. އިޔާޒް ސުވާލު އުފައްދާފައިވެއެވެ.
ބަންގިއަށް ފަހު 5 މިނިޓު ތެރޭގައި ގަމަތްދީ ނަމާދު ފެށަންޖެހޭއިރު އެއްވެސް ނަމާދެއް 7 މިނެޓަށް ވުރެ ދިގު ނުކުރަން އަންގާފައިވަނީ، މިސްކިތްތެރޭ ގިނަ ވަގުތު ގިނަ ބަޔަކު ހޭދަކުރަންޖެހޭނަމަ ކޮވިޑް ފެތުރުމުގެ ފުރުސަތު އޮންނާނެކަމަށް ބުނެ ކަމަށްވީއިރު ވެކްސިން ޖެހުމަށް އިސްލާމީ މަރުކަޒުތެރޭ 10 މިނެޓަށްވުރެ ގިނައިރު ކިޔޫގައި ގައިދުރުކަމެއް ނެތި ތިބެންޖެހެއެވެ. އެހެންކަމުން އެކަމަކީ ހަމަޖެހޭ އުސޫލެއްތޯ ގިނަ ބަޔަކު ދަނީ ސުވާލު އުފައްދަމުންނެވެ.