ނަމަވެސް ހިތާމައަކީ އެކަން ބައެއް މީހުންނަށް ފަހުމުނުވާ ކަމެވެ. އެފަދަ ދަނޑިވަޅެއްގައި މަޔަކު ހޮސްޕިޓަލަށް ގެންދެވުމުން އޭނާގެ ހަށިގަނޑުން އިތުރު ފުރާނައެއް އުފަންކުރުމަށް އެއަޅާ ވޭނުގައި އެންމެ އިތުބާރު ކުރެވޭނެ އެއް ބަޔަކީ ފަރުވާދިނުމަށް ތިބޭ ޑޮކްޓަރުންނާއި ނަރުހުންކަމަށް ވާއިރު އެމީހުންގެ ފަރާތުން ލިބެންވާ އަޅާލުން ނުލިބުނުތާ އެމައިމީހާ “ފޭކު” ޖައްސަނީކަމަށް ނުވަތަ "މާ ކަންތައް ބޮޑުކުރަނީ" ކަމަށް ބުނުމަކީ ލަދުވެތި އަދި މާ ހިތާމަވެރި ކަމެކެވެ.
މިއީވެސް އެފަދަ ހާދިސާއެކެވެ. ބަނޑަށް ފަސް މަހުގައި ބަނޑުގައި ރިއްސާތީ އައިޖީއެމްއެޗް ހޮސްޕިޓަލަށް ދިޔުމުން ދެ ދުވަސް ވަންދެން އެޑްމިޓްކޮށްފައި ދުވަސްނުފުރާ އަންހެން މިހާ ވިހެމާއި ހަމައަށް އަދި ދަރިފުޅަށް ދޭންވާ ސިއްހީ ފަރުވާ ނުދިން މައްސަލައެއްގެ ވާހަކައެވެ.
އާއިލާއިން ސޯޝަލް މީޑިއާގައި މި ހާދިސާ ހިއްސާކޮށްފައިވާ ގޮތަށް ބަލާއިރު، ބަނޑުގައި ރިއްސާތީ ދަރިފުޅުގެ މަންމަ ދިޔުމުން ހޮސްޕިޓަލްގައި ދެ ދުވަސް ވަންދެން ވަނީ އެޑްމިޓްކޮށްގެން ބާއްވާފައެވެ. އަދި ވިހެއުމުގެ ރިހުންވަރު ކައިރިވިއިރުވެސް ހޮސްޕިޓަލްގެ ޑޮކްޓަރުންނާއި ނަރުހުން އަޅާލާފައެއް ނުވާކަމަށް ބުނެ އެވެ.
އާއިލާއިން ބުނާގޮތުން އެހާލުގައި ވިހެއުމުން ވެސް އެ ހުރިގޮތަށް ފޫޅުގައި ދަތިވެސް ނުޖަހައި ފޫޅު ކަޑައިގެންގެން ގޮސް ކުޑަދަރިފުޅު ބާއްވާފައިވަނީ ފާހަނާ ނެޕީ ބަދަލުކުރުވަން ކުދިން ބާއްވާ ތަނެއްގައެވެ. އޭރު ކުއްޖާގެ ހުރިހާ ކަމެއްވެސް ބަރާބަރު ކަމަށް އާއިލާއިން ބުނެއެވެ.
އެއަށް ފަހު ކުއްޖާގެ މަންމަ ގެންގޮސް މަސް ވިއްސުވުމަށް ފަހު ގެނެސް ވޯޑަށް ނެރުނުއިރުވެސް ކުއްޖާ ބާއްވާފައިވަނީ އޭރު ބޭއްވިތާގައި ބޭއްވިގޮތަށް ސާފުވެސް ކޮށް ނުލާކަމަަށް އާއިލާއިން ބުނެއެވެ. އަދި އާއިލާއިން އެދުމުންވެސް އެނޫންގޮތެއް ނުހެދުމުން ކުއްޖާ ނަގާފައިވަނީ ހޮސްޕިޓަލްގެ މެނޭޖްމެންޓާއި ވާހަކަ ދެއްކުމުން ކަމަށް އާއިލާއިން ބުނެއެވެ. ކުއްޖާއަކީ ދުވަސް ނުފުރާ ވިހޭ ކުއްޖަކަށްވުމުން ކުއްޖާގެ ގުނަވަންތައް ރަނގަޅަށް އުފެދިފައެއް ނުވެއެވެ. އަދި ކުއްޖާ އޮތީ ވަރަށް ވެސް ކުޑަކޮށްނެވެ. މެނޭޖްމެންޓާއި ވާހަކަ ދެއްކުމުން ކުއްޖާ ނެގުމަށް ފަހު ހުދުފޮތި އަޅާއި، ލާފައިވަނީ ޓްރޭއަކަށެވެ. ކުއްޖާ މަރުވެފައިވަނީ އެހެން އެ ޓްރޭގައި އޮވެ ކަމަށް އެ އާއިލާއިން ތުހުމަތު ކުރެ އެވެ.
މެނޭޖްމެންޓާއި ވާހަކަ ދެއްކުމުން އެތަނުން ނަގާ ހުދު ފޮތި އަޅާފަައި ބޭބީ ޓްރޭއަކަށް ލީ. އެހެން ބޭއްވުމުން ބޭބީ އަށް ފިނިވާނޭ ނޫންހޭ އާއިލާއިން ވާހަކަ ދެއްކުުމުން ވެސް ތަނުގައި ތިބި މީހުން ބުނީ އެގޮތައް ވިހާ ކުދިން ބާއްވަން ޖެހެނީ އެހެންކަމަށް. އިތުރު ފަރުވާ އެއްވެސް ދެވެން ނެތް ގޮތަށް ވާހަކަ ދައްކާ ބޭބީ ނިޔާވަންދެންވެސް އެ އޮތްގޮތަށް ބޭއްވީ -އާއިލާ-
ކުއްޖާގެ ވިންދު ދަށްވާކަން ވެސް އަދި ނޭވާލުން ލަސްވާކަންވެސް އެނގިތިބެ އެތަނުގައި އެވަގުތު ތިބި އެއްވެސް މީހަކު ކުއްޖާއަށް ދޭންޖެހޭ ފަރުވާ' އާއިލާއިން ތަކުރާރުކޮށް އެދުމުންވެސް ނުދިންކަމަށް އާއިލާއިން ބުނެފައިވެ އެވެ.
ކުއްޖާ މަރުވެފައިވަނީ ކުއްޖާއަށް ލިބެންވާ ފަރުވާ ނުލިބި އެންމެ ކުޑަމިނުން “ބޮޑީ ވާމް” ވެސް ނުލިބިއެވެ.
އާއިލާއިން ވަނީ އެ މައުސޫމް ފުރާނަ މިދުނިޔެ އާއި ވަކިވުމާއި ހަމައަށް ވެސް ކުއްޖާ އަށް ދޭންޖެހޭ އަވަސް ސިއްހީ ފަރުވާދިނުމަށާއި، ކުއްޖާ ޓްރޭއެއްގައި ނުބާއްވާ އެއަށްވުރެ ރައްކާތެރިކޮށް ބޭއްވުމަށް އާދޭސްކޮށްފައެވެ.
އެހެންނަމަވެސް އެ ކުއްޖާއަށް ދޭންޖެހޭ ފަރުވާ ނުދިންތާ މައިމީހާއަށް ވެސް ކުއްޖާގެ ގައިގައި އަތްލުމުގެ ފުރުސަތު ވެސް ދީފައެއް ނުވެއެވެ.
އެ މައުސޫމް ތުއްތު ކުއްޖާ މަރުވެފައިވަނީ އާއިލާގެ އެއްވެސް މީހަކަށް އަދި މައިމީހާއަށް ވެސް ކުއްޖާ އުރާލުމުގެ ފުރުސަތުވެސް ނުލިބި އުޅެނިކޮށް ކަފުންކޮށްފައިވާ މައްޔިތަކު ފަދައިން "ހުދުފޮތި އޮޅާ ޓްރޭއެއްގައި ބާއްވާފައި" އޮއްވައެވެ.
ކުއްޖާ އުރާލަން ބޭނުންތޯވެސް އަހާފައިވަނީ ކުއްޖާ މަރުވި ފަހުން ކަމަށް ވެސް އާއިލާއިން ބުނެ އެވެ.
އާއިލާއިން ބުނީ، ރާއްޖޭގައި އޮންނަ އުސޫލުން މި މައްސަލާގައި ޒިންމާ އުފުލަންޖެހޭ އަދި އެމީހަކަށް އަދަބުދޭނެ މީހެއްވެސް ނުހުންނާނެ ކަމަށެވެ.
އާއިލާއިން އެ މައްސަލަ ހުށަހެޅުމުންވެސް ފުލުހުންނާއި ލޯޔަރުންނާއި، ތަންތަނުގެ ވެރިންނާއި މިނިސްޓަރުންގެ ފަރާތުންވެސް އެއްވެސް އެދެވިގެންވާ އެހީތެރިކަމަކާއި އެއްބާރުލުމެއް އާއިލާއަށް ލިބިފައިނުވާކަމަށް ހިތާމައާ އެކު ފާހަގަކޮށްފައިވެއެވެ.
މީގެކުރިން ވެސް ހޮސްޕިޓަލުތަކުގެ އިހުމާލުގެ ވާހަކަ މިގޮތަށް އާއިލާތަކުން ހިއްސާކޮށްފައި އެބަހުއްޓެވެ. އެކަމަކު މިކަމުގައި ހޮސްޕިޓަލުގެ ބަހެއް ހޯދަން ސީއެންއެމް އިން މީޑިއާ ކޯޑިނޭޓަރަށް ގުޅިނަމަވެސް ފޯނަށް ޖަވާބު ނުދެއްވާތީ ބަހެއް ލިބޭ ގޮތެއް ނުވި އެވެ.
ދުވަސް ނުފުރާ ވިހެއުމަކީ މަދުން ނަމަވެސް ދިމާވާ ހާލަތެކެވެ. އެހެން ނަމަވެސް މިފަދަ ހާލަތެއްގައިވެސް ރަނގަޅު ފަރުވާ ކުއްޖާއަށާއި މައިމީހާއަށް ފުރިހަމައަށް ފޯރުކޮށްދެވިއްޖެނަމަ ކުއްޖާގެ ފުރާނަ ސަލާމަތް ކުރެވިދާނެެެއެވެ.
މިމައުސޫމް ކުޑަ ކުއްޖާގެ ފުރާނައަށް ހެޔޮ ރަހްމަތް ލައްވާ އާއިލާއަށް ކެތްތެރިކަން ދެއްވާށެވެ.