ލީގު އަލުން ފަށަން ހުއްދަ ލިބުމާއި އެކު މިދިޔަ މަހުގެ ތިންވަނަ ދުވަހުން ފެށިގެން މެދު ކަނޑާލާފައިވާ ލީގު އަލުން ފަށާނީ މާދަމާއެވެ. އެކަން އެފްއޭއެމްގެ ރައީސް ބައްސާމް އަދީލް ޖަލީލު މިއަދު ކުރެއްވި ޓްވީޓެއްގައިވަނީ އިއުލާން ކުރައްވާފައެވެ.
ކޮވިޑާ ގުޅިގެން ދިވެހި ލީގު މެދު ކަނޑާލަން ޖެހި، ގިނަ ދުވަސްތަކެއްވެފައިވާތީ އެއްވަނަ ޑިވިޝަންގެ ފުޓުބޯޅަ ކްލަބުތަކުންވަނީ އެކި ގޮތްގޮތަށް ސަރުކާރަށް ޕްރެޝަރުކޮށްފައެވެ. އެންމެ ފަހުން މި ހަފުތާ ތެރޭ ކްލަބުތަކުންވަނީ ސަރުކާރުގެ ކަމާ ބެހޭ ފަރާތްތަކަށް އިންޒާރުވެސްދީފައެވެ.
ރަސްމީ ބޯޅަ ދަނޑުގައި ބޭއްވި ޕްރެސް ކޮންފަރެންސްގައި ވާހަކަ ދައްކަމުން މި ހަފުތާ ތެރޭ މާޒިޔާގެ ޖެނެރަލް ސެކެއްޓްރީ އަބްދުލްވައްހާބުވަނީ ކްލަބުތަކުން ދަރުބާރުގޭ ދޮށުގައި އެއްވާން ޖެހިދާނެ ކަމުގެ އިންޒާރު ދީފައެވެ. އަދި ކްލަބުތަކުން ދަރުބާރުގޭ ދޮށަށް ދާން ޖެހިއްޖެ ނަމަ އޭގެން ނުކުންނާނެ ނަތީޖާ ގޯސް ވެދާނެ ކަމަށް ވައްކޭ ބުންޏެވެ. ދަރުބާރުގެއަކީ، ކޮވިޑާ ގުޅިގެން ސަރުކާރުން ގާއިމްކޮށްފައިވާ އިމަރޖެންސީ ހެލްތުގެ މައި މަރުކަޒު ހިނގަމުންދާ އިމާރާތެވެ.
މާޒިޔާގެ ޖެނެރަލް ސެކެއްޓްރީ ވައްހާބުގެ ވާހަކައަށް ސަޕޯޓުކުރަމުން ކްލަބު އީގަލްސްގެ ވައިސް ޗެއަރމަން މުފާވިޒް ހާޝިމްވެސް ވަނީ ޒުވާނުންތަކެއް މަގުމައްޗަށް ނުކުމެގެން ކަމެއް ކުރަން އުޅެފިނަމަ މާ ރަނގަޅު ނުވާނެ ކަމުގެ އިންޒާރު ދީފައެވެ. މީގެ އިތުރުން ޔުނައިޓެޑް ވިކްޓްރީގެ ފަރާތުން ޕްރެސް ކޮންފަރެންސްގައި ވާހަކަ ދެއްކި އެ ކްލަބުގެ މެނޭޖަރު މުހައްމަދު ފަސީންވަނީ ޓެކްނިކަލް އެޑްވައިޒަރީ ގްރޫޕުގެ މީހުންގެ ގޭގޭގެ ދޮށް އެއްވެ މުޒާހަރާ ކުރަން ޖެހިދާނެ ކަމުގެ އިންޒާރުވެސް ދީފައެވެ.
ކޮވިޑާ ގުޅިގެން އަޅާފައިވާ ރައްކާތެރިކަމުގެ ފިޔަވަޅުތަކުގެ ތެރެއިން ފުޓްބޯޅަ ލީގުވަނީ މިދިޔަ މަހުގެ ކުރީކޮޅުން ފެށިގެން މެދު ކަނޑާލާފައެވެ. ލީގުގެ ކުޅުން މެދު ކަނޑާލިއިރުން ފެށިގެން ކްލަބުތަކާއި އެފްއޭއެމުން އަންނަނީ އެކި ގޮތްގޮތަށް ސަރުކާރަށް ޕްރެޝަރު ކުރަމުންނެވެ. ލީގުގެ ކުޅުން އަލުން މާދަމާ ފަށަން ނިންމިކަން އެފްއޭއެމުން އިއުލާން ކުރިއިރު އަންނަ މަހު މާލޭގައި އޭއެފްސީ ކަޕުގެ މެޗެއްވެސް ކުޅޭނެއެވެ. އޭނގެ ފަހުން މެއި މަހުވެސް އޭއެފްސީ ކަޕުގެ މެޗުތަކަށް ރާއްޖޭގައި ކުޅެންވަނީ ހަމަ ޖައްސާފައެވެ.
