މިނިސްޓަރު މިހެން ވިދާޅުވީ ސަރުކާރު ހިއްސާވާ ކުންފުނިތަކުގެ ޕްރޮކިއުމަންޓް ގައިޑްލައިނާއި ވަޒީފާއާއި ބެހޭ ޖޮބް ކްލެސިފިކޭޝަން ފްރޭމް ވޯކް އިފްތިތާހްކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
އަމީރު ވިދާޅުވީ ސަރުކާރުގެ އަމާޒަކީ ގިނަ ކުންފުނިތަކެއް އުފެއްދުން ނޫން ކަމަށާއި، ސަރުކާރުގެ އަމާޒަކީ ދެމެހެއްޓެނިވި އުސޫލަކުން ހަރުދަނާ ހިދުމަތްތަކެއް ފޯރުކޮށްދެވޭނެ ކުންފުނިތަކަކަށް ފުރުސަތު ދިނުން ކަމަށެވެ. އަދި މިހާރު ސަރުކާރުގެ ކުންފުނިތަކުގެ އުސޫލުތައް ހުންނަ ގޮތުން ކޮރަޕްޝަނަށް މަގުފަހިވާ ގޮތަށް ބައެއް ކަންތައް ހުރިކަމަށް އެބޭފުޅާ ވަނީ ފާހަގަ ކުރައްވާފައެވެ.
ކުންފުނިތަކުގެ ޕްރޮކިއުމަންޓް ގައިޑްލައިނާއި ވަޒީފާއާއި ބެހޭ ޖޮބް ކްލެސިފިކޭޝަން ފްރޭމް ވޯކް އިފްތިތާހު ކުރުމުގެ މި ރަސްމިއްޔާތުގައި އޮޑިޓާ ޖެނެރަލް ހަސަން ޒިޔަތު ވިދާޅުވީ، އިސްރާފު ކުރުމާއި ފަސާދަ ކުރުން މި ކަމާއި ގުޅިގެން ކުޑަ ކުރެވިގެން ދާނެ ކަމަށެވެ. އަދި މީގެ ސަބަބުން ކުންފުނި ތަކުގެ ހިންގުން ހަރުދަނާ ކުރެވިގެން ދާނެ ކަމަށް ވެސް ޒިޔަތު ވަނީ ވިދާޅުވެފައެވެ.