ބެންގަލޫރު އެފްސީގެ ކޭމްޕުން ތިން ކުޅުންތެރިން ކޮވިޑަށް ޕޮޒިޓިވްވިކަން އެ ކްލަބުން އިއުލާން ކުރިއިރު އެ ކްލަބުންވަނީ އޮނަތިރީސް ކުޅުންތެރިންގެ މައްޗަށް ހިމެނޭ ސްކޮޑެއް އޭއެފްސީ ކަޕަށް ރަޖިސްޓްރީކޮށްފައެވެ. އޭނގެތެރޭގައި ބިދޭސީ ހަތަރު ކުޅުންތެރިން ވެސް ހިމެނެއެވެ.
ބެންގަލޫރު އެފްސީން ތައްޔާރުވަމުން އަންނަނީ އަންނަ ބުދަ ދުވަހު، އޭއެފްސީ ކަޕް ކޮލިފައިންގައި ނޭޕާލުގެ އާމީ ޓީމާ ދެކޮޅަށް ކުޅޭ މެޗަށެވެ. މި މެޗުން މޮޅުވާ ޓީމެއް ގްރޫޕު ސްޓޭޖުން ފުރުސަތު ހޯދުމަށް ކުޅެން ޖެހޭނީ ހަމަ އެ ދުވަހު ރާއްޖޭގެ ކްލަބު އީގަލްސްއާ ބަންގްލަދޭޝްގެ ޑާކާ އަބަހާނީ ވާދަކުރާ މެޗުން މޮޅުވާ ބަޔަކާއެވެ.
ގްރޫޕް ސްޓޭޖުން މިހާރު ޖާގަ ހޯދާފައިވަނީ ރާއްޖޭން މާޒިޔާއާ، ބަންގްލަދޭޝްއިން ބަޝަންދުރާ ކިންގްސް އަދި އިންޑިޔާއިން އޭޓީކޭ މޯހަން ބަގާންއެވެ.
މިދިޔަ އަހަރުގެ އޭއެފްސީ ކަޕުގެ ކޮލިފައިންގައި ބެންގަލޫރު އެފްސީވަނީ ރާއްޖޭގެ މާޒިޔާ އަތްދަށުވެ ގްރޫޕް ސްޓޭޖުން ފުރުސަތު ނުލިބި މުބާރާތުން ކަޓާފައެވެ.
މިދިޔަ ސީޒަން ވެގެންގޮސްފައިވަނީ އެ ކްލަބުގެ ތާރީޙުގައި އެންމެ ނާކާމިޔާބު އަހަރަށެވެ. އޭނގެ ފަހުން މި އަހަރުގެ ސީޒަންގައިވެސް ފައްޗަކަށް ބަލިވެ، ޓީމު ޕްރެޝަރަށް ވެއްޓުމުން ހެޑް ކޯޗުވަނީ މަގާމުން ވަކިކޮށްފައެވެ.
