އިއްޔެ ނިންމާލި އިންތިހާބުގެ ކުރިން ކެމްޕެއިން ތެރެއިން ރައީސް ނަޝީދުވަނީ ޑރ. މުހައްމަދު މުއިއްޒު މާލޭ ސިޓީ ކައުންސިލްގެ މޭޔަރުކަމަށް އައިސްފިނަމަ ކަންކަން ކުރަން ވަރަށް ދަތިފުޅުވާނެ ކަމަށް ވިދާޅުވެފައިވެއެވެ. އެކަން ފާހަގަކޮށް މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ މިހާރު މުއިއްޒު މޭޔަރުކަމަށް ހޮވިވަޑައިގަންފައިވާތީ އެކަމާއި ދޭތެރޭ ދެކެނީ ކިހިނެތްތޯ ސުވާލުކުރައްވާފައެެވެ.
އެ ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ، މިހާރު މިއޮތީ ކޮވެއްޔަށް ވީގޮތް ވެނިމިފައި ކަމަށެވެ. އެހެންނަަމަވެސް މިއީ ހާލި ވައްޓާލަން ޖެހޭ ވަރުގެ ކަމެއް ނޫންކަން ފާހަގަކުރައްވަމުން ރައީސް ނަޝީދު ވިދާޅުވީ، ޕީޕީއެމްގެ ފަރާތްތެއް ކައުންސިލްތަކަށް އާ ނަމަވެސް ރައްޔިތުންނަށް ފޯރުކޮށްދޭންޖެހޭ ހިދުމަތްދިނުމުގައި އެބޭފުޅަކަށް ސަރުކާރުން އެެއްބާރުލުން ދޭން ޖެހޭނެ ކަމަށް ދެކެވަޑައިގަންނަވާ ކަމަށެވެ.
ރައީސް ނަޝީދު ވިދާޅުވީ އެކަމަށް އެއްވެސް ހުރަހެއް އަޅައިގެން ނުވާނެ ކަމަށާއި، ރައްޔިތުންނަށް މުހިންމުވަނީ އެކަންތަށް ކޮށްދެން ހުންނަ މީހެއް ނޫން ކަމަށާއި ކަންކަން ކޮށްދޭވޭނެ މީހެއް ކަމަށެވެ.
އެހެންކަމުން ޕީޕީއެމްގެ ކައުންސިލެއް އޮތްކަމުގައި ވީނަަމަވެސް ބަދަހިކަމާއިއެކު ކަންކަން ސަރުކާރާއި ގުޅިގެން ކުރައްވާނެ ކަމަށް ރައީސް ނަޝީދު ވިދާޅުވިއެވެ.