އެ ކޮމިޝަން ދޮށުގައި މިއަދު އެމްޑީޕީ އަދި ޕީޕީއެމްގެ ސަޕޯޓަރުންނާއި ދެޕާޓީގެ އިސް ލީޑަރުން އިސްވެތިބެ ހިންގި ހަމަނުޖެހުންތަކަށް ފަހު އީސީން ބޭއްވި ކުއްލި ނޫސްވެރިންގެ ބައްދަލުވުމުގައި ކަން ހިނގައިދިޔަ ގޮތް ސާފުކޮށްދެއްވަމުން އީސީގެ ރައީސް އަހްމަދު ޝަރީފް ވިދާޅުވީ، މިއަދު ހިނގާދިޔަ ހަމަނުޖެހުމާއި ގުޅޭގޮތުން ދެ ޕާޓީންވެސް މީޑިއާތަކުގައި ވާހަކަދައްކާފައިވަނީ ހަގީގަތް އޮޅޭ ގޮތަށް އެ ޕާޓީއެއްގެ މަސްލަހަތު ހިމެނޭ ގޮތަށް ކަމަށެވެ.
މިއަދު ކޮމިޝަން ދޮށުގައި ހަމަނުޖެހުން ހިގާފައިވަނީ އެމްޑްޕީއާއި ޕީޕީއެމްގެ ދެެމެދުގައެވެ. ސަބަބެއްކަމަށް ޕީޕީއެމްއިން ބުނެފައިވަނީ އެމްޑީޕީގެ ރައީސް ނަޝީދު އެ ސަރަހައްދަށް ވަޑައިގެން ވޯޓަށް ނުފޫޒް ފޯރުވުމަށް މަރުކަޒުތެރެއަށް ވަދެވަޑައިގަތުމެވެ. އެހެންނަމަވެސް އެމްޑީޕީން ބުނެފައިވަނީ އެކަން ކޮށްފައިވަނީ ޕީޕީއެމްގެ އިސް ލީޑަރުންކަމަށެވެ.
ރައީސް ނަޝީދު ކުރެއްވި ޓުވީޓެއްގައި ވިދާޅުވެފައިވަނީ އެމަނިކުފާނު އީސީގެ އިދާރާ ދޮށަށް ދާން ޖެހުނީ T4 ގެ ވޯޓް ފޮށި އަލުން ގުނުމަށް ތައްޔާރު ވެފައިވަނިކޮށް ޕީޕީއެމްގެ ލީޑަރުންނާއި އިސްވެރިން އީސީ އިދާރާއަށް ވަދެވަޑައިގެން 30 މިނެޓް ވީއުރުވެސް ނުނިކުންނެވީމަ ކަމަށެވެ.
އީސީގެ އޮފިޝަލުން ނޫން އެއްވެސް މީހަކު އީސީގެ އިދާރާއަށް ވަދެވަޑައިގެންފައި ނުވާނެ ކަމަށާއި ރައީސް ނަޝީދު ހުންނެވީ ބޭރުގައި ކަމަށް އެމަނިކުފާނު ވިދާޅުވި އެވެ.
ނަޝީދު ވަޑައިގަތްއިރު އަރިހުގައި ރައްޔިޔުންގެ މަޖިލީހުގެ ނައީބު ރައީސް އީވާ އަބްދުﷲ ގެ އިތުރުން އެމްޑީޕީގެ އިސްވެރިން ވެސް ވަޑައިގަތެވެ.
އެހެންނަމަވެސް ޝަރީފް ވިދާޅުވީ އެ ދެ ޕާޓީންވެސް ކަން ހިނގާދިޔަގޮތް ރިޕޯޓްކޮށްފައިވަނީ ހަގީގަތާއި ހިލާފަށް ކަމަށެވެ. އަދި ކޮންމެ ޕާޓީއަކުންވެސް މަސައްކަތް ކޮށްފައިވަނީ ޕާޓީގެ މަސްލަހަތަށް ކަމަަށް ޝަރީފް ވިދާޅުވިއެވެ. ވަކި ބަަޔަކު ކޮމިޝަނުގެ ތެރެއަށް ވަންކަމަށް ބުނާ ވާހަކަ ދޮގުކުރައްވަމުން ޝަރީފް ވިދާޅުވީ، އެއްވެސް ހާއްލެއްގައި ވަކި ސިޔާސީ ޕާޓީއަކަށް މަންފާއެއް ހޯދައިދިނުމުގެ ގޮތުން ވަކި ސިޔާސީ ޕާޓީއަކާއި ކޮމިޝަނުގެ ތެރެއިން ބައްދަލުކޮށްފައި ނުވާނެ ކަމަށާއި، ޕީޕީއެމް އަދި އެމްޑީޕީގެ އެއްވެސް ބޭފުޅަކާއިވެސް ބައްދަލުކޮށް ނަތީޖާއަށް އަސަރުކުރާ މަޝްވަރާތަކެއްވެސް އެތަނުގެ ތެރޭގައި ކުރެވިފައި ނުވާ ކަމަށެވެ.
ޝަރީފް ވިދާޅުވީ ވޯޓަށް ބަދަލުތަކެއް އަންނާނެ ފަދަ ގޮތަކަށް ވޯޓުފޮށިތަށް ގުނަން އުޅޭކަމުގެ ހަބަރު ކޮންމެވެސް ފަރާތަކުން ލިބިގެން ޕީޕީއެމްގެ ބައެއް އިސްލީޑަރުން މިއަދު އެ ސަރަހައްދުގައި ތިބިކަމަށެވެ. އެހެންކަމުން އީސީން އެވަގުތު ވާނީ މިއަދު އިލެކްޝަން ކޮމިޝަނުން އެފަދަ އެއްވެސް ކަމެއް ނުކުރާކަމުގެ ޔަގީންކަން އަރުވާ ސަޕޯޓަރުން ކައިރީ އެތަނުން ދުރަށް ޖެހުމަށް އެދުމަށް ޕީޕީއެމެގެ އިސްވެރިން ކައިރީ އެދިފައި ކަމަށާއި އަދި މިއަދު ހިންގަން ހަމަޖެހިފައިވާ އެކްސަސައިޒްވެސް މިހާރު ކެންސަލް ކުރެވިފައިވާކަމަށް އަންގާފައި ކަމަށެވެ.
އީސީ ޝަރީފް ވިދާޅުވީ މިއަދު ކޮމިޝަނުގެ އިންތިހާބީ މަރުކަޒުގައި އީސީގެ ފަރާތުން ކުރިއަށް ގެންދަން ރާވާފައިވާ ހަރަކާތަކީ އެއްވެސް ހާލެއްގައި ނަތީޖާއާއި ބެހޭގޮތުން އާއްމު ފަރާތަކުން ނުވަތަ ޕާޓީއެއްގެ ފަރާތުން ހުށަހަޅާފައިވާ ޝަކުވާއެއް ބެލުން ނޫން ކަމަށާއި ނުވަތަ އެ ޝަކުވާތައް ބެލުމަށް ވޯޓު ފޮށި ކަޑައިގެން ވޯޓުގުނުމަށް ކުރިއަށް ގެންދިޔަ ހަރަކާތެއްވެސް ނޫންކަމަށެވެ.
މިއަދު ކުރިއަށް ގެންދަން މަސައްކަތް ކުރި ހަރަކާތަކީ، ވަގުތީ ނަތީޖާތައް އިއުލާން ކުރުމަށްޓަކައި ބަލަން ހުރި ކަންކަން ސާފުކުރުމަށް ކުރިއަށް ގެންދިޔަ ހަރަކާތެއް ކަމަށެވެެ.
އަދި މިހާރު ވަގުތީ ނަތީޖާތައް އިއުލާން ނުކުރެވި ވަނީވެސް މިކަންކަން ސާފުނުކުރެވި ވާތީ ކަމަށާއި އެހެންނޫންނަމަ މިދިޔަ އާދިއްތަ ދުވަހު ވަގުތީ ނަތީޖާ އިއުލާން ކުރެވުނީސް ކަމަށް އީސީ ޝަރީފް ވިދާޅުވިއެވެ.
