އެ ޔޫނިއަން މިއަދު ނެރެފައިވާ ނޫސްބަޔާނެއްގައި ބުނެފައި ވަނީ ދިވެހި ރާއްޖޭގެ ވަޒީފާ އާއި ބެހޭ ގާނޫނު 2/2008 ގެ ދަށުން އުފެދިފައިވާ، އެމްޕްލޯއިމަންޓް އެޖެންސީތަކަކީ އިކޮނޮމިކް މިނިސްޓްރީގައި ރަޖިސްޓްރީ ކުރެވިގެން، އެކަމަށްޓަކައި ނަގަންޖެހޭ ހުރިހާ ހުއްދައެއް ނަގައިގެން ވިޔަފާރީގެ އުސޫލުން މަސައްކަތްކުރާ ކުންފުނިތަކެއް ކަމަށެވެ.

އަދި ހެލްތު މިނިސްޓަރީގެ ނަންބަރު 2015/04/IUL)23/PRIV) (20 ޖޫން 2015) ގައި ވާގޮތުގެ މަތިން އެ މިނިސްޓްރީގައި ރަޖިސްޓްރީވެވިގެން، އެމިނިސްޓްރީއަށް ބިދޭސީ ޑޮކްޓަރުންނާއި އެހެނިހެން ހެލްތް ޕްރޮފެޝަނަލުން ގެންނަމުން ދިޔައީ، ރާއްޖޭގައި ރަޖިސްޓްރީކޮށްގެން ހިންގަމުންދާ އެޖެންސީތަކެއް ކަމަށެވެ.

އަދި އެއީ ރާއްޖޭގައި ރަޖިސްޓްރީކޮށްގެން ހިންގާ ވަޒީފާ ހަމަޖައްސައިދޭ އެޖެންސީތައް އެއްފަރާތްކޮށް، ހެލްތު މިނިސްޓްރީން ކުރަމުން ގެންދާ މަސައްކަތަކީ، ގާނޫނު ނަންބަރު 6/2013 ހިލާފަށް، ރާއްޖޭގެ ކުދި އަދި މެދު ފަންތީގެ ވިޔަފާރިތަކުގެ ވިޔާފަރިތައް ސީދާ ފުނޑުފުނޑު ކޮށްލުމެއް ކަމަށް ވެސް އެ ޔޫނިއަން ވަނީ ތުހުމަތުކޮށްފަ އެވެ.

ރާއްޖޭގައި ރަޖިސްޓްރީކޮށްގެން ހިންގާ އެޖެންސީތައް ބާކީ ކޮށް، ސީދާ އިންޑިއާގެ އެޖެންސީތައް މެދުވެރިކޮށް، މިނިސްޓްރީ އޮފް ހެލްތުން ބޭނުންވާ ފަންނީ މުވައްޒިފުން ހޯދަން ކުރާ މަސައްކަތް، އެސޯސިއޭޝަނުން އެންމެ ހަރުކަށި އިބާރާތުން ކުށްވެރިކުރާ ކަމަށާއި އަދި އެކަން ހުއްޓުވައިދެއްވުމަށް، ސަރުކާރުގެ ކަމާއި ބެހޭ ހުރިހާ މުއައްސަސާތަކަށް ގޮވާލާ ކަމަށް ވެސް ބުނެފައި ވެއެވެ.