މިއީ މެންޗެސްޓަރ ސިޓީން، ލީގު ކަޕު ވިދިވިދިގެން ކާމިޔާބު ކުރި ހަތަރުވަނަ ފަހަރެވެ. ހަތަރުވަނަ ފަހަރު ލީގު ކަޕު، ސިޓީން މި ކާމިޔާބު ކުރީ ހެޑް ކޯޗަކު ނެތި ކުޅުނު ޓޮޓެންހަމް ބަލިކޮށްގެނެވެ. ޓޮޓެންހަމްގެ ކޯޗު ހޯސޭ މޮރީނިއޯވަނީ މި ދިޔަ ހަފުތާ ތެރޭ މަގާމުން ވަކިކޮށްފައެވެ. އެހެންކަމުން އާދިއްތަ ދުވަހުގެ ރޭ ޓޮޓެންހަމަށް އިރުޝާދު ދިނީ އެންމެ އޮނަތިރީސް އަހަރުގެ ރަޔާން މޭސަން އެވެ.

އާދިއްތަ ދުވަހުގެ ރޭ އިންގްލަންޑްގެ ގައުމީ ސްޓޭޑިއަމް- ވެމްބްލީގައި ކުޅުނު ލީގު ކަޕުގެ ފައިނަލް މެޗުގައި ސިޓީން ޖެހި ހަމައެކަނި ލަނޑު މެޗުން ނިމެން ދިހަވަރަކަށް މިނިޓަށްވެފައި ހުއްޓާ ޖެހީ، އައިމެރިކް ލަޕޯޓް އެވެ.