ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަމުން އެޗްޑީސީން ބުނެފައި ވަނީ އެތަނުގައި ހުންނާނީ ހަތަރު ވައްތަރެއްގެ އެޕާޓްމަންޓްތަކެއް ކަމަށާއި އެއީ މެރީނާ ވިއު އާއި އިނާ ވިއު އަދި އައުޓާ ވިއުގެ އިތުރުން ސްޓޭންޑާޑް ވިއު ކަމަށެވެ.
މެރީނާ ވިއު އެޕާޓްމަންޓްތަކުން ފެންނާނީ ޔޮޓް މެރީނާ އަދި ކްރޫޒް ޓާމިނަލް ކަމަށާއި އިނާ ވިއު އެޕާޓްމަންޓްތަކުން ފެނިގެން ދާނީ މައި މަގު ކަމަށާއި އައުޓާ ވިއު އިން ފެންނާނީ ސިޓީ ކަމަށް އެޗްޑީސީން ބުނެ އެވެ. އަދި ސްޓޭންޑާޑް އެޕާޓްމަންޓްތަކަކީ އިމާރާތުގެ މެދު ތެރޭގައި ހުންނަ އެޕާޓްމަންޓްތައް ކަމަށް އެޗްޑީސީ އިން ބުނެ އެވެ.
އެ ފްލެޓްތަކުގެ ފިނިޝިންގެ މަސައްކަތް ނިމޭއިރު، ލިވިން ރޫމާއި ކޮޓަރިތަކުގައި ހުންނާނީ ތަށިމުށި ޖަހައިފަ ކަމަށާއި ފާހާނާގެ ތަޅުމާއި ފާރުގައި ވެސް ތަށިމުށި ޖެހުމާއި ފާހާނާގައި ފިކްސްޗާސްތައް ވެސް ހަރުކޮށްފައި ހުންނާނެ ކަމަށް އެޗްޑީސީން ބުނެ އެވެ.
އަދި ބަދިގެ ކަބަޑު ސެޓު ވެސް ފާރުގައި ހަރުކޮށްފައި ހުންނާނެ ކަމަށާއި ބެލްކަނީ ހުންނާނީ ދޮންނަ މެޝިން ބެހެއްޓޭ ގޮތަށް، އަދި އި ލިވިން ރޫމާއި ކޮޓަރިތަަކުގައި ވެސް އޭސީ ހަރުކޮށްފައި ހުންނާނޭ ކަމަށް އެޗްޑީސީން ބުނެއެވެ. އެޕާޓްމަންޓްތައް ހަވާލުކުރާއިރު އެތަނުގައި ފަރުނީޗަރެއް ނުހުންނާނެ ކަމަށް އެޗްޑީސީން ބުނެ އެވެ.
އެޗްޑީސީން ބުނާ ގޮތުގައި އެ މަޝްރޫއުގެ ގްރައުންޑާއި ފަސްޓް ފްލޯ ހާއްސަ ކުރެވިފައި ވަނީ ކޮމާޝަލް ކަންކަމަށެވެ. އަދި އެތަންތަނުގައި އޮފީސް ސްޕޭސް އާއި ސުޕަމާޓް އަދި ކޮންވީނިއެންޓް ސްޓޯރާއި ކެފޭ ރެސްޓޯރަންޓާއި ޖިމް ހުންނާނެ ކަމަށެވެ.
އެ މަޝްރޫއުގެ 42 ޕަސެންޓް މަސައްކަތް މާޗު މަހާ ހަމައަށް ނިމިފައިވާ ކަމަށާއި އަންނަ އަހަރުގެ މެއި މަހުގެ ނިޔަލަށް އެ މަޝްރޫއު އެއްކޮށް ނިމޭނެ ކަމަށް ބެލެވޭ ކަމަށް އެޗްޑީސީން ބުނެ އެވެ.
އޯން އިކުއިޓީ ފައިނޭންސިން މޮޑެލްގެ ދަށުން، ޕްރޮޖެކްޓްގެ އަގު އެއް ފަހަރާ ވެސް ދެއްކޭނެ ކަމަށާއި އަދި ބަހާލައިގެން ޕޭމަންޓް ޝެޑިއުލްގެ ދަށުން ވެސް ފައިސާ ދެއްކޭނެ ކަމަށް އެޗްޑީސީން ބުނެ އެވެ.
އެޗުޑީސީ އިން ބުނީ "އެންޑް ޔޫސާ ފައިނޭންސިން މޮޑެލް"ގެ ދަށުން ބޭންކެއް ނުވަތަ އެހެން ފައިނޭންޝަލް އިންސްޓިޓިއުޓެއް މެދުވެރިކޮށް ލޯނެއްގެ ދަށުން އެޕާޓްމަންޓް ގަނެވޭނެ ކަމަށެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހިއްކާފައިވާ ހުޅުމާލޭގެ ދެވަނަ ފިޔަވަހީގައި ތަރައްގީ ކުރަމުން އަންނަ 13 ބުރީގެ 10 ޓަވަރުގައި ހުންނާނީ 1،344 ފްލެޓެވެ. މިއީ ތިން ކޮޓަރީގެ އެޕާޓްމަންޓްތަކެކެވެ.