ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ ފަލަސްތީނާއި އިޒްރޭލުގެ ރައްޔިތުންގެ މަޖިލީހުގައި ތަގުރީރު ކުރުމަށް ދިއުމަށް ދައުވަތު ލިބިފައިވީ ނަމަވެސް، އަދި އެކަމާ ގުޅޭގޮތުން ވަކި ގޮތެއް ނުނިންމަވާ ކަމަށެވެ.
ނަމަވެސް މިބާވަތުގެ ކަމައެއްގައި ވިސްނުމަކީ ވީހާވެސް ގިނަ ބަޔަކާ މައުލޫމާތު ހިއްސާކުރުމަށްފަހު އަމަލުކުރުން ކަމަށާއި ގޮތް ނިންމާނީ ރައްޔިތުން ކަަމަށް ވިދާޅުވިއެވެ. އެގޮތުން ފަލަސްތީނު ރައްޔިތުންގެ މިނިވަންކަން އަދި ފަލަސްތީނު ރައްޔިތުންނަށް ދައުލަތެއް ހައްގުކަން އެއީ ޔަގީން ކަމެއްކަމަށާއި، މަޖިލީހުގެ އެއްވެސް މެންބަރަކުވެސް އެކަމާ އިންކާރު ނުކުރާނެކަން އެމަނިކުފާނު ފާހަގަކުރެއްވިއެވެ.
އޭގެ އިތުރުން ރާއްޖޭގެ ރައްޔިތުންގެ ތެރޭގައި ހިޔާލު ފާޅުކުރެވޭ ތަފާތު މަގުތައްވާކަން ފާހަގަކުރައްވައި، އެ ހިޔާލު ފާޅުކުރުމުގެ ތެރެއިން ހުރިހާ އެންމެން ހިތްހަމަ ޖެހޭ ގޮތެއް ހޯދައި، އެގޮތުގެ މަތިން މަސައްކަތް ކުރިއަށް ގެންދާނެ ކަމަށްވެސް ރައީސް ނަޝީދު ވިދާޅުވިއެވެ.
އިޒްރޭލުން ގެންދަނީ ފަލަސްތީނުގެ ބިންތަކަށް ވެރިވެގަނެ، ފަލަސްތީނުގެ ރައްޔިތުންނަށް ލާއިންސާނީ އަނިޔާ ދެމުންނެވެ. މިކަންކަން ރާއްޖޭގެ ރައްޔިތުން އަބަދުވެސް ހަރުކަށި އިބާރާތުން ކުށްވެރިކުރެއެވެ.