ރާއްޖޭގައި ކޮވިޑުގެ ހާލަތު ގޯސްވެ، ދުވާލަކު ހަތް ސަތޭކައަށް ވުރެ ގިނަ މީހުން ޕޮޒިޓިވްވަމުން އަންނަތާ މިހާރު ހަފްތާއެއްހާ ދުވަސްވެފައިވާއިރު، ރައްކާތެރިކަމުގެ ފިޔަވަޅެއްގެ ގޮތުން މާލޭ ސަރަހައްދުގައިވަނީ ކާފިއު އިއުލާނުކޮށް، ކޮވިޑުގެ ހާލަތު ގޯސް އިންޑިއާއިން އަންނަ މީހުން ދެ ހަފުތާއަށް ކަރަންޓީނު ކުރަންވެސް ނިންމާފައެވެ. ބައިނަލް އަގްވާމީ މީޑިއާ ރިޕޯޓްތައް ބުނާ ގޮތުން ރާއްޖޭގައި ކޮވިޑުގެ ހާލަތު އިންތިހާއަށް ގޯސްވެފައިވުމުން، އޭއެފްސީ ކަޕުގެ މެޗުތައް ފަސްކުރުމަށް ސަރުކާރުންވަނީ އެދިފައެވެ. އެހެންނަމަވެސް ސަރުކާރުން އެދިފައިވާ ގޮތަށް މެޗުތައް ފަސް ނުކުރެވޭނެ ކަމަށާއި މިހާރުވެސް ކަނޑައަޅާފައިވާ ގޮތަށް މެޗުތައް ކުރިއަށް ގެންދަން އޭއެފްސީންވަނީ ނިންމާފައިކަމަށް މީޑިއާ ރިޕޯޓްތައް ބުނެއެވެ.
މިދިޔަ ހަފުތާ ތެރޭ، ކުޅިވަރު ވަޒީރު މަހްލޫފުވަނީ ރާއްޖޭގައި އޭއެފްސީ ކަޕުގެ މެޗުތައް ކުރިއަށްދާނީ ރައްކާތެރިކަމުގެ ފުރިހަމަ ފިޔަވަޅުތަކާ އެކު ކަމަށް ވިދާޅުވެފައެވެ. އޭނގެ ކުރިން ސަރުކާރުން ވަނީ އޭއެފްސީ ކަޕުގެ މެޗުތައް އިންޑިއާ އަދި ބަންގްލަދޭޝް ޓީމުތައް ހިމަނައިގެން ކުރިއަށް ގެންދާނީ ޚާއްސަ ހުއްދައެއްގެ ދަށުން ކަމަށް ވިބުނެފައެވެ. މިކަމާއި ގުޅިގެން އާއްމުން އަންނަނީ މެދު ނުކެނޑި ނުރުހުން ފާޅުކުރަމުންނެވެ.
ރައްކާތެރިކަމުގެ އެންމެ ފުރިހަމަ ފިޔަވަޅުތަކާ އެކު އޭއެފްސީގެ މެޗުތައް ކުރިއަށްދާނެ ކަމަށް ކުޅިވަރު ވަޒީރު މަހްލޫފު ވިދާޅުވި ނަމަވެސް، ބެންގަލޫރު އެފްސީގެ ކުޅުންތެރިއަކު މާލެ އައިސް ބަހުން ފައިބަމުން މާސްކު އެޅި މަންޒަރުވަނީ ފެނިފައެވެ.
އަދި ކުޅުންތެރިން ގޮވައިގެން ދަތުރުކުރި އެމްޕީއެލް ބަސް، ގްރޭޓާރ މާލޭ ބަސް ޓަރމިނަލުގައި ޕާކުކުރުމަށް ފަހު ބަހުން އެމްޕީއެލްގެ ދެ މުވައްޒަފަކު ފައިބައިގެން ބަސް ޓާރމިނަލަށް ވަތް މަންޒަރުވެސް ފެނިފައިވެއެވެ.