އެމްއެމްޕީއާރުސީގެ ބޮޑު ހިޔާނާތުގެ ލިސްޓުގައިވާ ނަންތަކުގެ ތެރޭގައި މެންބަރު އަލީ އާޒިމްގެ ނަންވެސް ހިމެނެއެވެ. ނަމަވެސް އާޒިމް ވަނީ ތުހުމަތުތައް ދޮގުކޮށް، ލިސްޓުން ނަން ނެގުމަށް އެދިފައެވެ.
މިކަމާ ގުޅިގެން އޮންލައިން ނޫހަކަށް ދެއްވި އިންޓަވިއުއެއްގައި އާޒިމް ވިދާޅުވީ މިހާރު އާޒިމް އަދާކުރަމުންދާ މަޖިލީހުގެ މެދުހެންވޭރު ދާއިރާ ތަމްސީލު ކުރުމަށް ބޭނުންވާ ވަރަށް ގިނަ ފަރާތްތައްވެސް އެބަތިބި ކަމަށެވެ. އެހެންކަމުން ކޮންމެ ފަދަ ވާހަކައެއް ދައްކައިގެންވެސް ނަން ކިލަނބު ކޮށްލުމަށް އެފަރާތްތަކުން މަސައްކަތް ކުރާނެ ކަމަށް އާޒިމް ވިދާޅުވިއެވެ.
އޭގެ އިތުރުން އެމްޑީޕީގެ ޕީޖީ ލީޑަރުކަމުގެ މަގާމަށް ދަހިވެތިވާ މީހުންވެސް މަދު ނޫން ކަމަށް އާޒިމް ވިދާޅުވިއެވެ. އަދި އެކަން އެމްޑީޕީގެ ޕީޖީ ގުރޫފުގައި ހިނގާ ބައެއް ކަންތަކަށް ބަލައިލިޔަސް، ނުވަތަ ޓުވީޓުތަކަށް ބަލައިލިޔަސް ވަރަށް ރަނގަޅަށް ޕީޖީ ލީޑަރުގެ މަގާމަށް ދަހިވެތިވެ ތިބީ ކޮން ބައެއްކަން ވަރަށް ސާފުކޮށް އެނގޭނެ ކަމަށް އާޒިމް ވިދާޅުވިއެވެ.
އާޒިމް އިތުރަށް ވިދާޅުވީ ކޮންމެ ސިޔާސީ މީހެއްގެވެސް ވިސްނުމަކަށް ވާނީ ސިޔާސީ ގޮތުން އެރޭ އެންމެ މައްޗަކަށް އެރުން ކަމަށެވެ. އަދި މަޖިލީހުގެ 65 މެންބަރުން ތިބޭއިރު އޭގެ ތެރޭގައިވެސް އެ ފިކުރު ހުންނަ ބޭފުޅުން ތިއްބަވާނެ ކަމަށް އާޒިމް ވިދާޅުވިއެވެ.