މިނިސްޓަރު މައުސޫމް ވިދާޅުވީ ޓޫރިޒަމް ދާއިރާގައި މަސައްކަތްކުރި ނުވަތަ މަސައްކަތް ކުރާ މަދު ފަރުދެއްގެ ނެއެއްގާނި އަމަލާއި ޖައްސައި، ދާއިރާގެ ހުރިހާ މުވައްޒަފުންނަށް ނިސްބަތްކޮށް ކުޑައިމީސް ބުނުމަކީ ވަރަށް ދެރަކަމެއް ކަމަށެވެ.
އަދި މިފަދަ އަމަލުތަކަކީ އެއްވެސް ހާލެއްގައި ބަލައި ނުގަނެވޭނެ އަމަލެއްގެ ގޮތުގައިވެސް މައުސޫމް ވަނީ ފާހަގަ ކުރައްވާފައެވެ.
ހަމައެހެންމެ ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންނަކީ ރާއްޖޭގެ އިގްތިސާދުގެ ފަހުރުވެރި ދިފާއީ ބާރުގެ ގޮތުގައިވެސް މިނިސްޓަރު ވަނީ ސިފަކުރައްވާފަ އެވެ.
މިމޭރުމުން މިނިސްޓަރު ޓްވީޓު ކުރައްވާފައިވަނީ ގެވެށި އަނިޔާގެ މައްސަލައިގައި ތުހުމަތު ކުރެވޭ މަޖްލިސް މެމްބަރު އީސައަށް ނުރުހުން ފާޅުކޮށް މީހަކު ކޮށްފައިވާ ޓްވީޓަކާއި ގުޅިގެންނެވެ.
އެޓްވީޓުގައި ބުނެފައިވަނީ މެމްބަރު އީސައަކީ ކުރިން ރޫމްބޯއީކަން ކޮށްފައިވާ މީހެއް ކަމަށާއި، ރޫމްބޯއީންނަކީ ތަންދޮރު އޮޅުން ނުފިލާ ބައެއް ކަމަށެވެ.
މި ޓްވީޓާއެކު ގިނަ ބައެއްގެ ފާޑުކިޔުން ޓްވީޓްކުރި މީހާއަށް އަމާޒުވުމުން އެ ޓްވީޓް ވަނީ ޑިލީޓްވެސް ކޮށްފައެވެ.