މާދިހުގެ ކުއްލި ވަކިވުން ވެގެންދިޔައީ ދިވެހި ކުޅިވަރު އާއިލާއަށް ލިބުނު ކުއްލި ސިހުމަކަށެވެ. ފޫ ނުބެއްދޭނެވަރުގެ ބޮޑު ގެއްލުމެކެވެ. މާދިހު ވަކިވުން ވެގެންދިޔައީ މުޅި ކުޅިވަރު އާއިލާއަށް އަސަރު ކުރުވިކަމަކަށެވެ. އޮލިމްޕިކް ކޮމިޓީގެ ޖެނެރަލް ސެކެއްޓްރީ މަރްޒޫގު ވިދާޅުވި ގޮތުގައި މާދިހުގެ ޚިދުމަތުގެ ވާހަކަ ފަށާނެ ގޮތެއްވެސް އެނގިވަޑައިނުގަންނަވައެވެ.
އުމުރުން ފަންސާސް އެއް އަހަރުގައި ކުއްލި ގޮތަކަށް ރޭ ނިޔާވި މާދިހު އަކީ ކުރިން ގައުމީ ޓީމްތަކަށް ކުޅުއްވި ކާމިޔާބު އެތްލީޓެކެވެ. ފަހުން އުޅުއްވީ ބޮޑަށް ހިންގުމުގެ ދާއިރާގައެވެ. އޭގެ އިތުރުން މާދިހުއަކީ ސެޓިފައިޑް ފިޒިއޯތެރަޕިސްޓެކެވެ.
މާދިހަކީ ކުޅިވަރުގެ އާޢިލާއެއްގެ މީހެކެވެ. އޭނާގެ އެއްބަނޑު އެއްބަފާ އެކަކީ ރާއްޖޭގެ ކުރީގެ އެއް ނަންބަރު ފޯވާޑު ޝާހް އިސްމާއިލްއެވެ. ޝާހް ވިދާޅުވި ގޮތުގައި މާދިހުއަކީ އޭނާގެ މުޅި ހަޔާތުގައި ދެގޮތެއް ނުވެ ހުންނެވި އޭނާގެ އެންމެ ބޮޑު ހިތްވަރެވެ.
ކުޅިވަރުގެ އިތުރުން މާދިހުއަކީ ދީނީކަންކަމަށް ވަރަށް ބޮޑު އިސްކަމެއް ދެއްވި ބޭފުޅެކެވެ. ވޭތިވެ ދިޔަ ދުވަސްތަކުގައި މާދިހުވަނީ ހައްޖަށް އަދި އުމްރާއަށް މީހުން ގެންދިޔުމުގައި އަގުހުރި މަސައްކަތެއް ކުރައްވާފައެވެ. އެގާރަވަރަކަށް އަހަރު، ހައްޖާޖީންނަށް އެހީތެރިވުމަށް ހައްޖުވެރިންނާ އެކު ހައްޖަށް އަދި އުމްރާއަށް މާދިހުވަނީ މާތްވެގެންވާ މައްކާއަށް ދަތުރުކޮށްފައެވެ. އޭނާގެ ގާތް މީހަކު ބުނި ގޮތުގައި ކޮވިޑުގެ ކަންތައް ހަމައަކަށް އެޅުމާއި އެކު، އަދި އާއްމު ދަތުރުތަކަށް އިންތިޒާމްތައް ހަމަ ޖެހުމާއި އެކު އަނެއްކާވެސް އުމްރާއަށް އަދި ހައްޖަށް މީހުންނަށް އެހީތެރިވެދިނުމުގެ ކަންކަން މާދިހު ގެންދެވީ ކުރައްވަމުންނެވެ. މީގެ އިތުރުން ރޯދަ މަހު މިސްކިތުގައި މީހުންނަށް ރޯދަ ވީއްލުމުގެ ކަންކަމަކީ މާދިހު ވަރަށް ފަރުވާތެރިކަމާ އެކު ކުރައްވަމުން އައިކަމަކެވެ.