އާއިލާއަށް ކުރިމަތިވި ކުއްލި ހިތްދަތި ކަމުގެ ވާހަކަ "ސީއެންއެމް"އާއި ހިއްސާކުރަމުން ސަމީއާގެ ބޭބެ ހަބީބު ބުނިގޮތުން ސަމީއާ ބްލީޑްވާތީ ރަށުގެ ޑޮކްޓަރަށް ދެއްކުމުން ލަފާދިނީ މާލެ ދިޔުމަށެވެ. އެެހެންކަމުން ދެން ދިޔައީ މާލެ އެެވެ. މާލޭ ހޮސްޕިޓަލެއްގައި އެޑްމިޓްކޮށްގެން ފަރުވާ ހޯދުމަށް ފަހު ރަނގަޅުވުމުން ދޫކޮށްލި އެެވެ. އެއަށް ފަހު ރަށަށް ދިޔައިރު ރޯގާގެ އަލާމަތްތައް ހުރުމާއި ގަދައަށް ކެއްސާތީއާ އެކު ރަށު ހޮސްޕިޓަލުގައި އެޑްމިޓްކޮށް ކޮވިޑް ޓެސްޓް ހެދިކަމަށް ސަމީއާގެ ބޭބެ ބުނެއެވެ.
ސަމީއާގެ ބޭބެ ކިޔައިދިންގޮތުން އެއީ މެއި މަހުގެ ފަހުކޮޅު ހިސާބެވެ. އޭރު ވަރަށް ބޮޑަށް ކެއްސާ، އުނދަގޫވާން ފެށުމުން ރަށު ހޮސްޕިޓަލުގައި އެޑްމިޓްކުރިކަމަށާއި ފަހުން ނޭވާ ލާން ވެސް އުނދަގޫވާން ފެށި އެވެ. ސަމީއާ ރަށު ހޮސްޕިޓަލުގައި އެޑްމިޓްކުރީ މެއި މަހުގެ 28 ވަނަ ދުވަހު އެވެ. ނޭވާލާން އުަނދަގޫވާން ފެށުމުން ހަމަ އެދުވަހު މާލެ ފޮނުވާލި އެވެ. މާލެ އާދެވުނީ އެދުވަހު އިރުއޮށްސޭކަށް ހާއިރު ކަމަށާއި މާލެ ގެނެވުމާއެކު ހުުޅުމާލެ މެޑިކަލް ފެސިލިޓީގެ އައިސީޔޫގައި ސަމިއާއަށް ފަރުވާދޭން ފެށިކަމަށް ބޭބެ ބުނެއެވެ.
ބޭބެ ކިޔާދިންގޮތުން ވެންޓިލޭޓަރަށް ލީއިރުވެސް ސަމީއާ އެހާ ސީރީޔަސްއެއް ނޫނެވެ. އޮކްސިޖަންވެސް އެހާ ދަށް ނޫން ކަމަށާއި، ބައެއް ދުވަސް ދުވަހު ދަށްވެ ރަނގަޅުވެލާފައި އަނެއް ދުވަހު ދަށްވެލާފައި، ހުރެދާނެ ކަމަށް ބޭބެ ބުނެއެވެ. އޭގެފަހުން އިއްޔެއަކީ ކޮއްކޮ ސަމީއާ ވަރަށް ރަނގަޅު ކަމަށް ޑޮކްޓަރު ބުނި ދުވަހެއް ކަމަށް އޭނާގެ ބޭބެ ބުނެ އެވެ. އޭގެފަހުން ވަރަށް ރަނގަޅަށް އޮތުމަށް ފަހު ސަމިއާގެ ހިތް ހުއްޓުނީ ކުއްލިއަކަށް ރޭ 10:15 ހާއިރު ކަމަށް ބޭބެ ބުނެއެވެ.
ސަމީއާ ބޭބެ ބުނީ ސާމިއާ މަރުވި ދުވަހުގެ ހެނދުނު ޑޮކްޓަރު ގުޅުއްވާފައި ވައި ލީކްވާތަނެއް ކެމެރާ ލައްވައިގެން ބަލައި ލީކުވާ ތަނަކަށް ހަށިގަނޑުން ލޭ ނަގައިގެން އެޅުމުން އާއްމުގޮތެއްގައި ބެނދޭނެ ކަމަށް ވިދާޅުވި ކަަމަށާއި، އެހެންނަމަވެސް ކެމެރާ ލައްވައިގެން ބެލިއިރު ވަރަށް ބޮޑަށް ފުއްޕާމޭ ފަޅައިގެންގޮސްފައިވާ ކަމަށް ޑޮކްޓަރު މައުލޫމާތު ދެއްވި ކަމަށް ހަބީބު ވިދާޅުވިއެވެ.
ހަބީބު ބުނީ ސަމީއާ ސަލާމަތްކުރެވޭތޯ ޑޮކްޓަރުން ވަރަށް މަސައްކަތް ކުރިކަމަށާއި އެހެންނަމަވެސް ފުއްޕާމޭ ފަޅައިގެން ގޮސްފައި ހުރި ތަންތަނަށް ލޭ އެޅުމުން ވެސް އެތަންތަން ނުބެދޭތީ ދެން ދެވޭނެ ފަރުވާއެއް ނެތް ކަމަށް ޑޮކްޓަރު ވިދާޅުވި ކަމަށެވެ. ޑޮކްޓަރު އުންމީދު ކަނޑާލާ، ފޯނުކޯލް ބޭއްވިތާ އިރުކޮޅެއް ނުވެ، އެ ރޭ 12:45 ހާއިރު ސަމީއާގެ ހިތްހުއްޓި ނިޔާވި ކަމުގެ ފޯން ކޯލް ޑޮކްޓަރުގެ ފަރާތުން ލިބުނު ކަމަށް ހަބީބު ބުނެއެވެ.
ވެންޓިލޭޓަރުގައި 15 ދުވަސް ހޭދަކުރުމަށް ފަހު ސަމިއާ އޭނާގެ އެންމެ ފަހުގެ ނޭވާ ދޫކުރިއިރު، ވެންޓިލޭޓަރަށް ލުމުގެ ކުރިން އޭނާގެ އަލަތު ދަރިފުޅު ވަނީ ސިޒޭރިއަން ހައްދައިގެން ނަގާފައެވެ. ސަމީއާ ދުނިޔެ ދޫކުރީ ފިރިމީހާ އާއި އާއިލާގެ އެކަކުވެސް ލޮލަށް ފެނިލުމުގެ ފުރުސަތު ނުލިބިއެވެ.
ކޮވިޑަށް ޕޮޒިޓިވްވެފައިވުމާ އެކު މެއި 28 ވަނަ ދުވަހު ފެސިލިޓީއަށް ގެންގޮސް އައިސީޔޫގައި ފަރުވާ ދޭން ފެށި ފަހުން އާއިލާގެ މީހަކަށްވެސް އަދި ފިރިމީހާއަށް ވެސް ސަމީއާ ފެނިލުމުގެ އަދި ވާހަކަ ދައްކާލުމުގެ ފުރުސަތެއް ވެސް ނުލިބެ އެވެ. ސިޒޭރިއަން ހަދައިގެން ދަރިފުޅު ނަގާ، ވަގުތުން ނާސަރީއަށް ގެންދެވުނު އިރު، ސަމިއާ ލެވުނީ ވެންޓިލޭޓަރަށެވެ.
ދަރިފުޅު ނާސަރީގައި އޮތުމުގެ ސަބަބުން އާއިލާއަށް ވެސް އަދި ސަމީއާގެ ފިރިމީހާއަށް ވެސް އެ ތުއްތު ދަރިފުޅުވެސް އަދި ފެނިފައެއް ނުވެއެވެ. އެހެން ނަމަވެސް އެ ތުއްތު ދަރިފުޅު ނާސަރީން މާދަމާ ވޯޑަށް ބަދަލުކުރާނެކަން އާއިލާއަށް އަންގާފައިވާ ކަމަށް ހަބީބު ބުނެއެވެ.
ސަމީއާގެ ބޭބެ ހަބީބު ސީއެންއެމްއާ މިވާހަަކަތައް ހިއްސާކުރީ ފުން ހިތާމައާ އެކުއެވެ. އާއިލާއަށް ލިބުނު ފުން ހިތާމާގެ މިވަގުތުވެސް ސަމިއާގެ ފިރިމީހާވެސް ދައްކަމުންދަނީ ވަރުގަދަ ހިތްވަރެއްކަން ހަބީބު ފާހަގަކުރި އެވެ.
ސީއެންއެމްއިން އެދެނީ އާއިލާއަށް ކެތްތެރިކަން ދެއްވާ، ސަމީއާގެ ފުރާނައަށް ދާއިމީ ސުވަރުގެ މިންވަރުކޮށްދެއްވުމެވެ.
