ރޮޒައިނާ މިފަދައިން ވިދާޅުވެފައި މިވަނީ ސަރުކާރުން އެމްއެމްޕީއާރުސީގެ ހިޔާނާތުގެ މައްސަލަ ބަލަން ބޭނުން ނުވާކަމަށް އެމްޑީޕީގެ ޗެއާޕާސަން ހަސަން ލަތީފު ވިދާޅުވެފައި ވަނިކޮށެވެ.
ރޮޒައިނާ މިއަދު ކުރެއްވި ޓުވީޓެއްގައި ވިދާޅުވީ ރައީސް ސޯލިހުގެ ސަރުކާރުން ވެރިިކަމާ ހަވާލުވި ފަހުން ޖުމްލަކޮށް ކުރައްވާފައިވާ މަސައްކަތްތައް ވަރަށް ރަނގަޅު ކަމަށެވެ. އެގޮތުން ކޮވިޑް-19 ގެ މި ހާލަތުގައިވެސް ސަރުކާރުގެ ވަޒީފާއިން މީހުން ނުކަނޑައި ތަރައްގީގެ ޕްރޮޖެކްޓުތައްވެސް ހިންގަވާކަން ފާހަގަކުރެއްވިއެވެ.
ރޮޒެއިނާ ވިދާޅުވީ ރައީސް ސޯލިހުގެ ސަރުކާރުން ކޮރަޕްޝަންގެ އަމަލުތަކަށްވެސް ބަރާބަރަށް ފިޔަވަޅު އަޅާކަމަށެވެ.
ސަރުކާރާ އެމްޑީޕީގެ މަސައްކަތް ދެބައިވެފައިވާކަމަށް ދެކެވޭ ވާހަކަތަކާ ގުޅިގެން ހަސަން ލަތީފު ވިދާޅުވެފައިވަނީ ސަރުކާރާއި އެމްޑީޕީގެ މަސައްކަތްތައް ދެބައިވާންޖެހުނީ އެމްއެމްޕީއާރްސީ ހިޔާނާތުގެ މައްސަލަ އާއި ކޮރަޕްޝަން މައްސަލަތައް ބަލަން ސަރުކާރުން ފަސްޖެހެން ފެށުމުން ކަމަށެވެ.
އޭގެ އިތުރުން ހަސަން ލަތީފު ދެއްކެވި ވާހަކަތަކަށް ތާއިދުކުރައްވައި ރައީސް މުހައްމަދު ނަޝީދުގެ ފޭކު ޓުވިޓާ އެކައުންޓުކަމަށް ބުނާ އެލެކްސް އަހުމަދުގެ އެކައުންޓުން ބުނެފައިވަނީ ސަރުކާރުން ބޭނުންވީ އެމްއެމްޕީއާރުސީގެ މައްސަލައާއި މަރުތަކުގެ މައްސަލަ އޮއްބާލަން ކަމަށެވެ.