ކޮވިޑް 19 އާ ގުޅިގެން ވިޔަފާރިތައް ލުއިދިނުމާ ބެހޭގޮތުން މިއަދުގެ މަޖިލީހަށް ހުށަހެޅިފައިވާ ގަރާރަށް ބަހުސްކުރައްވަމުން ޖާބިރު ވިދާޅުވީ އެ ގަރާރަށް ތާއީދުކުރަނީ ގަރާރު ކޮމިޓީއަށް ގެންގޮސް ސަރުކާރުން ލާރި ހޯދާނެ ގޮތެއް ސަރުކާރަށް ކިޔައިދޭން ކަމަށެވެ. ވިޔަފާރިތަކަށް އެހީވާ ފަދައިން ގޭގައި ބަންދުވެފައި ތިބި މަސްވެރިންނާއި ދަނޑުވެރިންގެ އިތުރުން ގޭބީސީ ތަކުގައި ދިރިއުޅޭ އެންމެންނަށްވެސް އެހީވާންޖެހޭ ކަމަށް ޖާބިރު ވިދާޅުވިއެވެ.
ޖާބިރު ވިދާޅުވީ ވިޔަފާރިތައް ހިންގުމަށް އުނދަގޫވަނީ ގަވާއިދުތަކާއި ގާނޫނުތައް މާގިނަވުމުން ކަމަށެވެ. ވިޔަފާރިތައް ފްރީ ހޭންޑެޑްކޮށް އޮޕަރޭޓްކުރެވޭނެ ނިޒާމެއް ހަމަޖައްސަން ޖެހޭ ކަމަށް ޖާބިރު ވިދާޅުވިއެވެ. އަދި ކޮރަޕްޝަނާ ނުލައި ޓްރާންސްޕޭރެންޓުކޮށް ވިޔަފާރި ހިންގޭނެ ނިޒާމެއް ގާއިމުކުރަންޖެހޭ ކަމަށާއި ބޭންކު އޮފް މޯލްޑިވްސް ކޮމާޝިއަލް ކޮށް އޮޕަރޭޓް ކުރަންޖެހޭ ކަމަށް ޖާބިރު ވިދާޅުވިއެވެ.
ޖާބިރު އިތުރަށް ވިދާޅުވީ ރައީސް ސޯލިހު އިންތިހާބުގެ ތެރޭގައި ވަޓަވައްރެހާ ނިންމުމަށްޓަކައި ބޭނުންވާ ފައިނޭންސް ބޭންކު އޮފް މޯލްޑިވްސް މެދުވެރިކޮށް ހަމަޖައްސައިދޭނެ ކަމަށް ވިދާޅުވި ކަމަށެވެ. އެހެން ނަމަވެސް ބީއެމްއެމް އިން އެކަމަށް ބޭނުންވާ ލޯނު ނުދިނީ ފަހަރެއްގައި ކުލަ އަލި ނުވީމަ ކަމަށް ޖާބިރު ވިދާޅުވިއެވެ.