އިންޑިޔާއާ ނޭޕާލް ވާދަކުރާ ސާފް ޗެމްޕިއަންޝިޕުގެ ފައިނަލް މެޗު އޮންނާނީ ހޮނިހިރު ދުވަހުގެ ރޭއެވެ. މުބާރާތުގެ ފައިނަލަށް ނޭޕާލް ދިޔައީ ކުޅުނު ހަތަރު މެޗުގެ ތެރެއިން ދެ މެޗު ކާމިޔާބުކޮށް އެއް މެޗު އެއްވަރުކޮށްގެން ޖުމްލަ ހަތް ޕޮއިންޓާ އެކު ދެވަނަ ޓީމުގެ ގޮތުގައެވެ. ނޭޕާލް ބަލިވީ އިންޑިޔާ އަތުންނެވެ. ރާއްޖެއާ ލަންކާއާ ކުޅުނު މެޗުން މޮޅުވެފައިވާއިރު ބަންގްލަދޭޝްއާ ދެކޮޅަށް ކުޅުނު މެޗުންވީ އެއްވަރެވެ.
އޮންލައިންކޮށް ހުކުރު ދުވަހު މެންދުރު ފަހު ބޭއްވި ފައިނަލް މެޗުގެ ޕްރީމެޗް ޕްރެސް ކޮންފަރެންސްގައި ނޭޕާލުގެ ކެޕްޓަން ކިރަން ބުނީ ފައިނަލް މެޗު އުނދަގޫވާނެ ކަން އެނގޭ ކަމަށެވެ. އެހެންނަމަވެސް އިންޑިޔާ ބަލިކުރާނެ ކަމަށާއި މުޅި ޓީމުވެސް ތައްޔާރުވެތިބީ އެކަމަށް ކަމަށް، ކުރިން ރާއްޖޭގެ ޓީސީ ސްޕޯޓްސްއަށް ކުޅުނު ކިރަން ބުންޏެވެ.
މިއީ ސާފް ޗެމްޕިއަންޝިޕުގެ ފައިނަލަށް ނޭޕާލަށް ދަތުރުކުރި ފުރަތަމަ ފަހަރެވެ. މި ފަހަރުގެ ސާފް ޗެމްޕިއަންޝިޕް ނޭޕާލުން ފެށީ ފުރަތަމަ މެޗުގައި ރާއްޖޭގެ މައްޗަށް ކުރި ހޯދައިގެންނެވެ. ރާއްޖެ އަތުން އެއް ލަނޑު ސުން ލަނޑުން ނޭޕާލު ފުރަތަމަ މެޗުގައި މޮޅުވިއިރު އެއީ ނޭޕާލުގެ ސީނިއަރ ޓީމު ރާއްޖެ އަތުން މިހާތަނަށް މޮޅުވި ފުރަތަމަ މެޗުވެސްމެއެވެ.
