އެމްއެމްޕީއާރްސީގެ ހިޔާނާތުގެ ފައިސާ ކަމަށް ތުހުމަތުކުރާ އެއް މިލިއަން ޑޮލަރު ރައީސް ޔާމީންގެ އިސްލާމިކް ބޭންކްގައި އޮންނަ ސޭވިން އެކައުންޓަކަށް ޖަމާކޮށް މަނީ ލޯންޑާކުރި ކަން ސާބިތުވުމުން ރައީސް ޔާމީން ފަސް އަހަރަށް ޖަލަށްލުމަށް ހުކުމްކުރީ 2019 ވަނަ އަހަރުގެ ނޮވެމްބަރު މަހުގެ 28 ވަނަ ދުވަހު އެވެ. އޭގެފަހުން 501 ދުވަހު ޖަލުގައި ހުންނެވުމަށްފަހު ގޭ ބަންދަށް ވަޑައިގެންފައިވަނީ އެޕްރީލް މަސްތެރޭގައެވެ.
ރައީސް ޔާމީން ގެއަށް ބަދަލުކޮށްފައިވަނީ މާފުށީ ޖަލުގައި ކޮވިޑް ފެތުރެމުންދިޔުމާއި ގުޅިގެންނާއި އާއިލާގެ ފަރާތުން އެކި ފަހަރުމަތިން އެގޮތަށް އެދިފައިވަނިކޮށެވެ.
އެމައްސަލަގެ އިސްތިއުނާފު ޝަރީއަތްތައް ނިމި ރައީސް ޔާމީން ޖަލުން މިނިވަންވީ މިދިޔަ އަންގާރަ ދުވަހުއެވެ.
ދެ އަހަރާއި ދެ ދުވަސްފަހުން އިދިކޮޅު ޕޯޑިއަމަށް އަރަވައިޑައިގެން ވާހަކަދައްކަވަމުން ރައީސް ޔާމީން ވިދާޅުވީ، އެއީ އިމްތިހާނެއް ކަމަށާއި، އެކަމެއްގެ ވަގުތު ޖެހުމުން ﷲ މިންވަރުކުރައްވާ ފަދައަކުން އެކަމެއް ވާނެ ކަމަށެވެ.
ރާއްޖޭގެ އަދުލުގެ ނިޒާމުއޮތީ ސާފުކުރަން ޖެހިފައިކަން ފާހަގަކުރައްވާ، ރައީސް ޔާމީން ވިދާޅުވީ، ބައެއް ފަޑިޔާރުން ނުހައްގުން މައްސަލަތައް ނިންމެވީމައިވެސް ބައެއް ފަރާތްތަކުން އެމީހާގެ ވަޒީފާ ގެއްލިގެންދާނެތީ އިހްސާންތެރިވާކަމަށް ބުނެ ފިޔަވަޅު ނާޅާ ދޫކޮށްލާ ކަމަށެވެ.
މިމޭރުމުން ވާހަކަދައްކަވަމުން ރައީސް ޔާމީން ވަނީ އެ ގޮތަށް ހަމްދަރްދީ ވާ މީހުން އެމަނިކުފާނާއި އެމަނިކުފާނުގެ އާއިލާއަށް ހަމްދަރުދީ ނުވަނީ ކީއްވެތޯ ސުވާލު އުފައްދާފައެވެ.
ރައީސް ޔާމީން ވިދާޅުވީ، އެމަނިކުފާނު އެވާހަކަ އަސަރާއިއެކު ދައްކަވާނެ ކަމަށާއި، ނަމަވެސް އެކަން ކުއްވެރި ނުކުރައްވާނެ ކަމަށެވެ.
ރައީސް ޔާމީން ވިދާޅުވީ، ރާއްޖޭގައި ތިބީ ކޯޓުތަކުގެ ކަންކަމަށް އަތްބޭނޭ ހިސާބުތަކުގައި ހުންނަ ކޯޓުތަކާއި، ކަންކަމާއި ވާހަކަދެކެވޭ ފަޑިޔާރުންނާއި، ވާހަކަނުދެއްކޭ ފަނޑިޔާރުންގެ އިތުރުން، އަތް ނުބޭނޭ ހިސާބުތަކުގައި ތިބި ފަނޑިޔާރުން ކަމަށެވެ.
ފަނޑިޔާރުންނަކީވެސް ރައްޔިތުންގެ ތެރެއިން ބައެއްކަން ފާހަގަކުރައްވާ ރައީސް ޔާމީން ވަނީ، އަދުލުވެރިކަމާއި، އިންސާފާއި ހަމަހަމަކަން އިސްކުރެއްވުމަށް ފަނޑިޔާރުންގެ ކިބައިން އެދިލައްވާފައެވެ. އަދި ކޮންމެ ފަނޑިޔާރަކަށްވެސް “ނޫނެކޭ” ބުނަން އެގެން ވާނެ ކަމަށް ރައީސް ޔާމީން ވިދާޅުވިއެެވެ.