އާ ސީޒަން މި ހަފުތާ ތެރޭ ފެށުމަށް އެފްއޭއެމުންވަނީ ނިންމާފައެވެ. މާޒިޔާއާ ކްލަބު ވެލެންސިޔާ ކުޅޭ ޗެރިޓީ ޝީލްޑް މެޗުން އާ ސީޒަން ފަށަން ކަނޑައަޅާފައިވަނީ އަންނަ ބުދަ ދުވަހުގެ ރޭއެވެ. ސީޒަން ފެށުން ހަފްތާއަކަށްވުރެ ކުޑަތަންވެފައިވަނިކޮށް އެފްއޭއެމްގެ ކުރީގެ ރައީސް އަލީ އާޒިމް މިއަދު ކުރެއްވި ޓްވީޓެއްގައި ތުހުމަތު ކުރައްވާފައިވަނީ އެފްއޭއެމް ބަނގުރޫޓޫ ވެއްޖެ ކަމަށެވެ.
އާޒިމްގެ މި ތުހުމަތުތަކަށް އެފްއޭއެމުން ރަސްމީކޮށް ޖަވާބެއް ދީފައި ނުވެއެވެ. އެހެންނަމަވެސް ރާއްޖޭގެ ފުޓްބޯޅައިގެ މައި އިދާރާ އެފްއޭއެމްގެ މުވައްޒަފުންތަކެއް މަގާމުން ވަކިކުރަން އެ އިދާރާއިން ނިންމާފައިވާކަންވަނީ ކަށަވަރުވެފައެވެ. މި މައްސަލައިގައި އެފްއޭއެމުން ރަސްމީކޮށް އަދި ވާހަކަ ނުދެއްކި ނަމަވެސް މީޑިއާ ރިޕޯޓްތައް ބުނާ ގޮތުން ހަ މުވައްޒަފެއް ވަޒީފާއިން ވަކިކުރަނީ އެސޯސިއޭޝަން ރީސްޓްރަކްޗާ ކުރުމުގެ މަސައްކަތުގެ ތެރެއިންނެވެ. އަދި މިއީ ހުރިހާ މުވައްޒަފުންގެ އިވެލުއޭޝަނެއް ހެދުމަށް ފަހު ނިންމާފައިވާ ނިންމުމެއް ކަމަށްވަނީ މައުލޫމާތު ލިބިފައެވެ.