އެމްއެމްޕީއާރުސީގެ ކޮރަޕްޝަންގެ ދައުވާ އުފުލާފައިވާ ކުޅިވަރު ވަޒީރު މަހްލޫފަށް، ކޮމަންޑޫގައި ބޯޅަ ދަނޑެއް ނެތްކަން އެނގިވަޑައިގެން އެ ރަށުގައި ދަނޑުގެ މަސައްކަތް، އެމްޓީސީސީގެ ސީއެސްއާރު ޕްރޮޖެކްޓްގެ ދަށުން ކުރަން ފަށަން ނިންމާފައިވާކަން މަހްލޫފު އިއުލާން ކުރެއްވީ މިއަދު ކުރެއްވި ޓްވީޓެއްގައެވެ. މަހްލޫފް މި ޓްވީޓް ކުރައްވާފައިވަނީ އާއްމުކޮށް އެ ޓްވީޓަށް އެހެން މީހުންނަށް ޖަވާބު ނުދެވޭ ގޮތަށެވެ.
މަހްލޫފުގެ މި ޓްވީޓަށް އެތައް ބަޔަކު އަންނަނީ ރައްދު ދެމުންނެވެ. ގިނަ މީހުން ފާހަގަކޮށްފައިވަނީ އިންތިޚާބާ ދިމާކޮށް ކެމްޕެއިނަށް މަހްލޫފް ފަށާނެ ކަމަށް އިއުލާން ކުރި މަސައްކަތެއް ކަމަށެވެ.
ހުސްވެފައިވާ ކޮމަންޑޫ ދާއިރާގެ ގޮނޑީގެ ކެމްޕެއިންގެ ފޯރި ގަދަވެފައިވާއިރު، އެމްޑީޕީގެ ކެންޑިޑޭޓަށް ތާއީދު ހޯދުމަށް ރައީސުލް ޖުމްހޫރިއްޔާ ކޮމަންޑޫއަށް ވަޑައިގަންނަވަންވަނީ ހަމަ ޖެހިފައެވެ. އަނެއްކޮޅުން އިނދިކޮޅު ޕީޕީއެމް ކޯލިޝަންގެ ކެންޑިޑޭޓަށް ތާއީދު ހޯއްދެވުމަށް ރައީސް ޔާމީންވެސް ކޮމަންޑޫއަށް ވަޑައިގަންނަވަން ނިންމަވާފައިވާއިރު، އެމްއެންޕީގެ ކެންޑިޑޭޓުގެ ކެމްޕެއިންވެސް ފޯރީގައި ދަނީ ކުރިއަށެވެ.
