ހުސްވެފައިވާ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި އެމްޑީޕީގެ ފަރާތުން ވާދަ ކުރައްވާ ކެންޑިޑޭޓު މުހައްމަދު ރާޝިދުގެ ކެމްޕެއިން ލޯންޗު ކުރެއްވުމަށް ރޭ ށ. ކޮމަންޑޫގައި އެމްޑީޕީން ބޭއްވި ހާއްސަ ޖަލްސާގައި ވާހަކަދައްކަވަމުން ރައީސް ސޯލިހް ވިދާޅުވީ، ކުރަން ހެޔޮ ނުވާނެ ކަމަކީ މުޅިން އެހެން ކަމަކާއި ގުޅޭ ބަޔަކަށް ވޯޓު ދިނުން ކަމަށެވެ. 

އެގޮތުން ކާނަލް ނާޒިމް އާއި، ކުރީގެ ރައީސް ޔާމީނަށް ވެސް ނުސީދާ ގޮތުން ބަހުގެ ހަމަލަ ރައްދުކުރައްވާ އެ ފަރާތްތަކަށް ވޯޓު ދެއްވުމަކީ ކުރަން ހެޔޮވާވަރު ކަމެއް ނޫންކަމަށް ވިދާޅުވެ، ރައީސް ސޯލިހް ވާހަކަ ދެއްކެވިއެވެ.

ރައީސް ސޯލިހް ވިދާޅުވީ، މިހުރިހާ ކަމަކަށް ނޫނެކޭ ބުނާނެ ކެނޑިޑޭޓަކީ އެމްޑީޕީގެ ކެންޑިޑޭޓު ރާޝިދު ކަމަށާއި، އެންމެންވެސް އޭނާއަށް ވޯޓު ދެއްވުމަށް ރައީސް ވަނީ އެދިވަޑައިގެންފައެވެ. 

ރައީސް ސޯލިހް އިއްޔެ ށ. ކޮމަންޑޫއަށް ވަޑައިގެންނެވީ ރާޝިދުގެ ކެމްޕެއިން ލޯންޗުކުރެއްވުމަށެވެ. އެ ދަތުރުގައި އެރަށުގައި 32 އަހަރުވަންދެން ހިންގަމުންދިޔަ އިންޖީނުގެ ބަންދުކޮށް ފެނަކައިން ތަރައްގީ ކޮށްފައިވާ އާ އިންޖީނުގެ ހުޅުއްވާ ދެއްވިއެެވެ. 

ރައީސް ސޯލިހް ޕީޕީއެމްގެ ރައީސް ޔާމީންއާއި، އެމްއެންޕީގެ ރައީސް މުހައްމަދު ނަޒީމަށް އަށް ނުސީދާ ގޮތުން ބަހުގެ ހަމަލާ ދެއްވިއިރު، މި އިންތިހާބުގައި އިދިކޮޅުން ދެން ބައިވެރިވަނީ އެމްއެންޕީއާއި، ޕީޕީއެމް އެވެ. 

ކުރިއަށް އޮތް ފެބްރުއަރީ މަހުގެ ފަސްވަނަ ދުވަހު ބާއްވާ ބައި އިލެކްޝަނުގައި ވާދަކުރައްވާ ދެ ޕާޓީގެ ކެންޑިޑޭޓުންވެސް މިހާރު ގެންދަވަނީ ދާއިރާގެ ތިން ރަށަށް ވަޑައިގެން ކެމްޕެއިން ކުރައްވަމުންނެވެ. އެގޮތުން އެމްއެންޕީގެ ރައީސް ނާޒިމް އާއި ކެންޑިޑޭޓު ގާނޫނީ ވަކީލު މުސާ ފަތުހީ އެރަށަށް ވަޑައިގެން މިދިޔަ އާދިއްތަ ދުވަހުގެ ރޭ ވަނީ ހާއްސަ ޖަލްސާއެއް ބާއްވާފައެވެ. 

އަދި ޕީޕީއެމްގެ ކެންޑިޑޭޓު، ގާނޫނީ ވަކީލު މުސާ ފަތުހީވެސް ވަނީ ކޮމަންޑޫއަށް ހަމައެރޭ ކެމްޕެއިން ޓީމާއިއެކު ވަޑައިގެންފައެވެ. މި ކެމްޕެއިންގައި ބައިވެރިވުމަށް މި ހަފްތާ ތެރޭ ރައީސް ޔާމީންވެސް އެ ރަށަށް ވަޑައިގަންނަވާގޮތަށް ވަނީ ހަމަޖެހިފައެވެ.