ރައްޔިތުން މަޖިލީހުގެ މިއަދުގެ ޖަލްސާގައި ތިމަރަފުށީ ދާއިރާގެ މެންބަރު ޢަބްދުﷲ ރިޔާޒް ކުރެއްވި ސުވާލަކަށް ޖަވާބުދެއްވަމުން މިނިސްޓަރު ޝައުނާ ވިދާޅުވީ ރާއްޖެއަށް ދިމާވެފައި އޮތް އެންމެ ބޮޑު މައްސަލައަކީ ކުނީގެ މައްސަލަ ކަމަށާއި, ނަމަވެސް މިވީހާތަނަށް ކުނި މެނޭޖުކޮށްފައެއް ނެތް ކަމަށެވެ. އަދި އުފެދޭ ކުނިން އާމްދަނީ ލިބޭ ވަސީލަތަކަށް ހެދުމުގެ ބަދަލުގައި އައީ އެއް ތަނަކަށް ޖަމާކުރަމުން ކަމަށެވެ.
ކުނީގެ މައްސަލަ ހައްލުކުރުމަށް ރާއްޖޭގެ ތިން ސަރަހައްދެއްގަ ރީޖަނަލް ވޭސްޓް މެނޭޖްމަންޓް ސެންޓަރު ގާއިމުކޮށް ކުނި މެނޭޖް ކުރުމަކީ ސަރުކާރުގެ އަމާޒުކަމަށް މިނިސްޓަރު ޝައުނާ ވިދާޅުވި އެވެ. އަދި އެ އަތޮޅުތަކުގައި އެއް ރަށުން އަނެއް ރަށަށް ކުނި ގެންދިއުމުގެ ބަދަލުގައި ކުނި ޖަމާކޮށްފައި, ރީޖަނަލް ވޭސްޓް މެނޭޖްމަންޓް ސެންޓަރަށް ގެންދެވެންދެން ޓްރާންސްފާ ސްޓޭޝަނެއް ގާއިމުކުރާނެ ކަމަށެވެ. އެ ގޮތުން ރ. ވަންދޫގައި ހުރި ފެސިލިޓީ މި އަހަރުގެ ޖޫން މަހުގައި އޮޕަރޭޝަން ލެވެލްއަށް ގެންނާނެކަމަށް މިނިސްޓަރު ވިދާޅުވި އެވެ.
ކުނީގެ މައްސަލަ މިވީހާތަނަށް ހައްލު ނުކުރެވި އޮތް ނަމަވެސް މިއަހަރުގެތެރޭގައި މި މައްސަލަ ބޮޑުތަނުން ހައްލުކުރެވިގެން އަންނަ ތަން ރާއްޖޭގެ ހުރިހާ ރައްޔިތުންނަށް ވެސް ފެނިގެންދާނެކަމަށް މިނިސްޓަރު ޝައުނާ ވިދާޅުވިއެވެ.
