ތިރީސް އަހަރު ވަންދެން ރާއްޖޭގެ ވެރިކަން ކުރެއްވި ރައީސް މައުމޫން ''ސީއެންއެމް'' އަށް ދެއްވި އިންޓަވިއުއެއްގައި ވިދާޅުވީ ދެން ރާއްޖޭގެ ރައީސްކަމަށް ކުރިމަތިލައްވަން ގަސްދެއް ނުކުރައްވާ ކަމަށެވެ.
ނަމަވެސް އަންނަ ރިޔާސީ އިންތިހާބަށް އެމްއާރްއެމްއިން ކެންޑިޑޭޓެއް ނެރުމަކީ ވެދާނެކަމެއްކަމަށް ވެސް ރައީސް މައުމޫން ވިދާޅުވިއެވެ. އެކަމަކު އެކަމަށް ގޮތެއް ނިންމާނީ ޕާޓީތެރޭގައި ކުރެވޭ މަޝްވަރާތަކަށްފަހުކަމަށް ވެސް ރައީސް މައުމޫން ވިދާޅުވިއެވެ.
ރައީސް މައުމޫނަކީ 1978 ވަނަ އަހަރުން ފެށިގެން 2008 ވަނަ އަހަރާއި ހަމައަށް ރާއްޖޭގެ ރައީސްކަމުގައި ހުންނެވި ބޭފުޅާއެވެ. 2008 ވަނަ އަހަރު ބޭއްވި ރިޔާސީ އިންތިހާބުގައި ރައީސް މައުމޫނާއި ވާދަކުރައްވައި އިންތިހާބު ކާމިޔާބު ކުރެއްވީ ރައްޔިތުން މަޖިލީހުގެ މިހާރުގެ ރައީސް މުހައްމަދު ނަޝީދެވެ. ރައީސް މައުމޫނުގެ މައްޗަށް ނަޝީދު ކުރި ހޯއްދެވީ އެހެން ޕާޓީތަކާއެކު ހެދި އިއްތިހާދަކުންނެވެ.
