މީގެ ތެރޭގައި 70 ޓަނު މަހާ އެއްކޮށް ހުޅުމާލެ ކަންނެލި ޖެޓީގެ ކިއުއަށް އެރި ދޯންޏެއްވެސް ހިމެނެއެވެ. 

" 70 ޓަނުމަހާއެކު އަހަރެމެން އައިސް މިތިބީ. ކޫއްޑޫއަށް މަސް ނުކިރިގެން އައިސް މިތިބީ" އެދޯނިން ވާހަކަ ދެއްކި މަސްވެރިއަކު ބުންޏެވެ. 

ރާއްޖޭގެ ދެކުނުގެ ސަރަހައްދުތަކަށް އާދަޔާއި ހިލާފަށް މަސްވެރިކަން ރަނގަޅުވެ، ކޫއްޑޫއިން ކޮންމެ ދޯންޏަކުން ވެސް މިހާރު ގަންނަނީ ފަސް ޓަނު މަހެވެ. 

މިކަމާ ގުޅިގެން ގިނަ މަސްވެރިން ހިތްހަމަ ނުޖެހުން ފާޅު ކުރަމުންދާ މި ދަނޑިވަޅުގައި، އެ ސަރަހައްދުގެ ބައެއް ދޯނިތައް ވަނީ ހުޅުމާލޭގެ ކަންނެލި ޖެޓީއަށް، މސް ކިރުމަށް އައިސްފައެވެ. 

އެގޮތުން މިހާރުވެސް ހުޅުމާލެ ކަންނެލި ޖެޓީގައި، ދެކުނުގެ ގިނަ ދޯނިފަހަރު ތައް ކިއުގައި ތިބި ކަމަށާއި، ކޮންމެ ދޯންޏެއްގައި ވެސް 30 ޓަނަށްވުރެ ގިނައިން މަސް ހުންނާނެ ކަމަށް ހުޅުމާލެ ކަންނެލި ޖެޓީގައި ކިއުގައި އޮތް ދޯއްޏެއްގެ މަސްވެރިއަކު ބުންޏެވެ. 

މަސްވެރިން ބުނާ ގޮތުން މިހާރު މަސް ވިއްކަމުން އެދަނީ އެންސިސް ފިޝަރީޒް ޕްރައިވެޓް ލިމިޓެޑަށެވެ.

މިކަމާއި ގުޅިގެން ގިނަ މަސްވެރިން އަންނަނީ ނުރުހުން ފާޅުކޮށް ސަރުކާރުން މިކަމަށް ކޮންމެސް ހައްލެއް ހޯދައިދޭން ގޮވާލަމުންނެވެ. އަދި ގިނައިން މަސްބޭނޭ ދުވަސްވަރެއްގައި އެމަހަށް އެކަށީގެންވާ ފައިސާ ނުލިބުމަކީ ހިތާމަ ކުރާ ކަމެއް ކަމަށްވެސް މަސްވެރިން ބުނެއެވެ.