އޭޝިއަން ކަޕް ކޮލިފައިގައި ކިރިގިސްތާނުގައި ކުޅުނު ރާއްޖެ ހިމެނޭ ގްރޫޕުގެ މެޗުތައް މިއަދު ވަނީ ރާއްޖެއަށް ނިމިފައެވެ. ކޮލިފައިންގައި ކުޅުނު ތިން މެޗުންވެސް ރާއްޖެ ބަލިވި ނަމަވެސް ސައްޓ ފާހަގަ ކުރި ގޮތުގައި ޓީމުން ރަނގަޅު ކުޅުމެއް ކުޅުނެވެ. ސޯޝަލް މީޑިއާގައި ސައްޓު ބުނީ ލިބިފައިވާ ވަސީލަތްތަކަށް ބަލާއިރު ކުޅުން ރަނގަޅު ކަމަށެވެ.
ކޮލިފައިންގައި ކުޅުނު ފުރަތަމަ މެޗުގައި ރާއްޖޭން އިރާނު އަތުން ބޮޑު ތަފާތަކުން ބަލިވިއިރު ފަހު ދެ މެޗުންވެސް ބަލިވިއެވެ. އެހެންނަމަވެސް ފަހު ދެ މެޗުގައި ދިވެހި ޓީމުގެ ނަތީޖާ ކުރީ މެޗަށް ވުރެ ރަނގަޅެވެ.
ކޮލިފައިން މެޗުތަކަށް ދިވެހި ޓީމު ދިޔައީ މާލޭގައި އެތައް އުނދަގޫތަކެއް ތަހައްމަލު ކުރުމަށް ފަހުއެވެ. ދިވެހި ޓީމަށް ޕްރެކްޓިސް ކުރެވޭނެ ގޮތެއް ނެތިގެން އުޅެން ޖެހުނެވެ. މުބާރާތް ކުޅޭނީ އިންޑޯރ ކޯޓެއްގައި ނަމަވެސް ރާއްޖޭގައި އިންޑޯ ކޯޓެއް ނުވެސް ނެތެވެ. އިންޑޯ ކޯޓެއް ނެތްތާ ޓަރފު ދަނޑެއްގައިވެސް ޕްރެކްޓިސް ކުރުމަށް ގައުމީ ޓީމަށް އެކި ކަހަލަ ގޮން ޖެހުންތައް ކުރިމަތިވެފައިވެއެވެ. ދަނޑު ނުލިބުމާއި، ލިބޭ ދަނޑުތަކުގެ ސައިޒް ދިމާނުވުމާއި ދަނޑުތައް ހަލާކުވެފައި ހުރުމާއި މި ފަދަ އެތައް އުނދަގުލެއް ގައުމީ ފުޓްސަލް ޓީމުން ތަހައްމަލު ކުރިއެވެ.
