މެޓް އޮފީހުން ވަނީ ނ. އަތޮޅުން ފެށިގެން ތ. އަތޮޅާއި ދެމެދުގައިވާ ސަރަހައްދު ތަކަށް މޫސުން ގޯސްވާނެ ކަމަށް ލަފާކޮށް ހުދު ސަމާލު ނެރެފައެވެ. 

އެ އިދާރާއިން ނެރެފައިވާ ސަމާލުގައި ބުނެފައިވަނީ، މިރޭ 20:00 އާއި ހަމައަށް މި ސަރަހައްދުގެ ރައްތަކަށް 19 މޭލާ 24 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށެވެ. އަދި ވިލާގަނޑުގައި ގަޑިއަކު 45 މޭލަށް ވައިގަދަވާނެ ކަމަށްވެސް މެޓް އޮފީހުން ވަނީ ބުނެފައެވެ. 

މީގެ އިތުރުން އެއިދާރާއިން ބުނީ، މި ސަރަހައްދުގެ ކަނޑުތައް ގަދަވާނެ ކަމަށާއި، އެހެން ކަމުން ކަނޑު ދަތުރު ކުރާ ފަރާތްތަކުން މޫސުމަށް ހާއްސަ ސަމާލުކަމެއް ދީ، މޫސުމާއި ބެހޭ އެންމެ ފަހުގެ މައުލޫމާތު ހޯދުމަށް އެދޭ ކަމަށެވެ. 

ރާއްޖޭގެ ބޮޑު ސަރަހައްދަކަށް ހުދު ސަމާލު ނެރެފައިވާއިރު، ކުރިއަށް އޮތް އީދު ބަންދާއި ދިމާކޮށް ގިނަ ބަޔަކު އަންނަނީ ދަތުރުތައް ކުރަމުންކަން ފާހަގަ ކޮށްލެވެއެވެ. މިކަމާއި ގުޅިގެން މެޓް އޮފީހުގެ އިތުރުން އެމްއެންޑީއެފް އިންވެސް ވަނީ މޫސުމަށް ހާއްސަ ސަމާލުކަމެއް ދިނުމަށް އެދިފައެވެ.