ދައްކަން މި އުޅެނީ ބަޔަކު މީހުން މި ގައުމު އަޅުވެތި ކުރި ވާހަކައެއް ނޫނެވެ. ނުވަތަ ބިރުވެރި ނާމާންކަމެއް ކުރިމަތިވެގެން އުޅޭ ވާހަކައެއްވެސް ނޫނެވެ. އަދި ގުދުރަތީ ބޮޑު ކާރިސާއެއް ދިމާވެގެން އެކަމުގެ ވާހަކައެއްވެސް ނޫނެވެ. މާރާމާރީތައް އިތުރުވެ، ވަޅި ޖަހާ ވާހަކަ އެވެ. 

ބަރަކާތްތެރި ރަމަޟާން މަސް އަޅުގަނޑުމެންނާއި އަލްވަދާއުކީ ވަރަށްގިނަ ނަސޭހަތާއި ފިލާވަޅުތައްވެސް ބުނެދީފަ އެވެ. ރިވެތި އަހުލާގާއި މަޑުމައިތިރިކަމެވެ. އިހްތިރާމް ކުރުމާއި އެހީތެރިކަމަށެވެ.

ނަމަވެސް ކަންކަން ހިނގަމުންދަނީ މިއާ މުޅިން ހިލާފަށެވެ. ފިތުރު އީދު ދުވަހުގެ އެންމެ މުނާސަބަތު ވަގުތުގައި މާލެ ފެންނަން އޮތީ ބިރުވެރިކަމުގެ ތެރޭގަ އެވެ. 

•  02 މޭ 2022 - އީދުވިލޭރޭ ފަތިހު 05:48 ހާއިރު މާވެޔޮ މިސްކިތް ކައިރިން ވަޅިން ހަމަލާދީ 23 އަހަރުގެ ދެ ޒުވާނަކު ޒަހަމްކޮށްލުން
•  02 މޭ 2022 - އީދު ދުވަހުގެ ހެނދުނު 09:17 ހާއިރު ޖަނަވަރީ މަގާއި މަޖީދީ މަގު ގުޅުނު ހިސާބުގައި ވަޅިން ހަމަލާދީ ދެ ޒުވާނަކު ޒަހަމްކޮށްލުން
•  04 މޭ 2022 - 21:17 ހާޢިރު ހުޅުމާލޭގައި ހުންނަ "ލަޔާ" ކެފޭއަށް ބަޔަކު ވަދެ ވަޅިން ހަމަލާދީ ބަޔަކު ޒަހަމްކޮށްލުން
•  04 މޭ 2022 - 21:32 ހާއިރު ހުޅުމާލެ ފޭސް2 ގެ ބީޗު ސަރަހައްދުގައި ޒުވާނެއްގެ ގަޔަށް ވަޅިހަރައި ޒަހަމް ކޮށްލުން
•  05 މޭ 2022 - ދަންވަރުގެ ވަގުތެއްގައި މާލޭ ސޯސަންމަގުގައި ހުންނަ ސިޓީ ބޭކަރީ ކައިރީގައި ވަޅިން ހަމަލާދީ ޒުވާނަކު ޒަހަމްކޮށްލުން

 ބެލެވޭ ގޮތުގައި މި މާރާމާތީތަކުގައި ހަރަކާތެރިވަނީ ގޭންގުތަކަށް ނިސްބަތްވާ މީހުންކަން އެނގެ އެވެ.

•  05 މޭ 2022 - 00:15 ހާއީރު ހުޅުމާލޭ ފޭސް2ގެ 12 ވަނަ ޓަވަރުން މާރާމާރީ ހިންގި ކަމަށް ބެލެވޭ ފަސް މީހަކު ހައްޔަރުކުރުން
• 05 މޭ 2022 - މާލެ އާއި ހުޅުމާލޭގައި ހިންގި މާރާމާރީތަކާއި ގުޅިގެން ތުހުމަތު ކުރެވޭ ފަރާތްތައް ހޯދުމަށް ވަނަވަރާއި ފޮޓޯ އާއެކު އާންމުކުރުން

ފުލުހުން ހޯދަމުން އަންނަ ހަތް މީހުން 

މީގެ ކުރިން ހިނގާފައިވާ މާރާމާރީތަކާއި ގުޅިގެން ފުލުހުންގެ ސީރިއަސްއެންޑް އޯގަނައިޒް ކްރައިމް ޔުނިޓުން މި މައްސަލަތައް ބާރު ސްޕީޑެއްގައި ތަޙްގީގު ކުރަމުންދާޢިރު ރޭ ހުޅުމާލޭގައި ހިންގާފައިވާ ދެ މާރާމާރީއަކާޢި ގުޅިގެން ފުލުހުންގެ އޮޕަރޭޝަންތައް އިތުރަށް ފުޅާކޮށްފައިވެ އެވެ. 

ހުޅުމާލޭގެ ދެސަރަހައްދެއްގައި ވަޅިޖަހައި ބަޔަކަށް ސީރިއަސް އަނިޔާތަކެއް ދިނުމަށްފަހު ފިލަން ދިޔަ ގޭންގު ގުރޫޕު ވަދެފައިވަނީ ފޭސް2 ގައި ހުންނަ 12 ވަނަ ޓަވަރަށެވެ. 

ގޭންގުތަކުން 12 ވަނަ ޓަވަރަށް ވަތްތާ ކުޑަ ވަގުތުކޮޅެއްގެ ތެރޭގައި ފެނިގެންދިޔައީ ފުލުހުންގެ އެސްއޯ ޓީމުގެ ބޮޑު ފައުޖެއް އެސަރަހައްދަށް އެއްވި މަންޒަރެވެ. 

ކުށް މަދު ކުރުމަށާއި، މުޖުތަމައުގެ ސަލާމަތާއި ރައްކާތެރިކަން ކަށަވަރުކުރުމަށް ހުރި ދައުލަތުގެ އެކިއެކި އިދާރާތަކުން ކުރަމުންގެންދާ މަސައްކަތް އޮތީ ފިނިހަކަ ދުވެލީގައިކަން ރައްޔިތުންނަށް މިއަދު އެނގެއެވެ. 

ކުއްކުރުން ގިނަވުމާއި އެކަންކަން ހުއްޓުވަން އޮތް ހައްލަކީ ކޮބައިކަމާއި ބެހޭގޮތުން މިއަދު ކޮންމެ ރައްޔިތަކާއި ސުވާލުކޮށްލިއަސް އަންނަނީ ހަމަ އެންމެ ޖަވާބެކެވެ. ތަންފީޒީ އިދާރާތައް ފެއިލްވެފައިވާ ވާހަކަ އެވެ. 

ކުށް މަދުކޮށް މި މުޖުތަމައު ކުށުގެ ވެށިން ސަލާމަތްކުރުމަށް ދައުލަތުގެ ތަންފީޒީ އިދާރާތަކުން މިއަށްވުރެ ބޮޑަށް ސަމާލުކަން ދިނުމަށް މަސައްކަތްކުރަންޖެހޭކަމަށް މިއަދު ގަބޫލުކުރަން ޖެހެއެވެ. 

ރައްކާތެރި މުޖުތަމައުއެއް ބިނާކުރުމަކީ ސަރުކާރުގެ މައިގަނޑު މަގުސަދު ކަމުގައިވާއިރު މިކަމަށް ކަމާއިބެހޭ އިދާރާތަކުން މިއަށްވުރެ ހަރުދަނާ ފިޔަވަޅުތަކެއް އަޅަންޖެހެއެވެ. 

ގޭންގު ކުއްތައް އަނެއްކާވެސް އިތުރު ވަނީ އެވެ. " ވަޅިޖަހަނީ . ސަލާމަތް އޮތީ ކޮން ބަޔަކަށް " ހެއްޔެވެ؟