ސީއެންއެމްއަށް ދެއްވި އިންޓަރވިއުއެއްގައި ނިލަންދޫ ކައުންސިލްގެ ރައީސް އަލީ އަހުމަދު މިއަދު ވިދާޅުވީ ނިލަންދޫގެ ނަރުދަމާ ނިޒާމުގެ މައްސަލަ އަށް ހައްލު ހޯދުމަށް ކަމާއިބެހޭ ހުރިހައި އިދާރާއަކަށްވެސް ވަދެފައިވާ ކަމަށެވެ.
ކައުންސިލްގެ ރައީސް ވިދާޅުވީ ރައްޔިތުންނަށް ފޯރުކޮށްދޭންޖެހޭ މިފަދަ ޒަރޫރީ މައްސަލަތަކުގައި ނިމިގެންދިޔަ ސަރުކާރާއި، އަދި މިސަރުކާރުންވެސް ހައްލު ހޯދާދެވިފައިނުވާ ކަމަށާއި، މިއީ ކަންބޮޑުވާންޖެހޭ މައްސަލައެއް ކަމަށެވެ.
އާބާދީގައި ދެތިން ހާހަށްވުރެ ގިނަ ބަޔަކު ދިރިއުޅޭ މި ރަށުގައި ނަރުދަމާ ނިޒާމަށް އެދެވޭ ހައްލެއް ނުލިބި މަގުމަތީގައާއި، ގޯތި ތަކުގެ އެތެރޭގައި ހަދާފައިވާ ޖަންގުޝަންތަކުން އަބަދުވެސް ނަޖިސް ބޭރުވެގެން އެ ޝަކުވާ ކުރަމުންދާކަމަށް އަލީ ވިދާޅުވި އެވެ.
އަލީ ވިދާޅުވީ ނަރުދަމާގެ މައްސަލަ ޖެހި ހައްލު ނުވުމުން މިކަމުގައި ޒިންމާވާންޖެހޭ ފަރާތް ނުވަތަ ފެނަކަ ކޯޕަރޭޝުން ދިނީ "ފިނި ޖަވާބެއް" ކަމަށާއި،"މައްސަލަ ހައްލުކޮށްދެއްވާނެ" ކަމަށް އަބަދުވެސް ވިދާޅުވަމުން ގެންދަވާ ކަމަށެވެ. ނަމަވެސް މިހާތަނަށް މިކަމުގައި އަމަލީ ސިފައެއް ނުފެންނަ ކަމަށެވެ.
ނަރުދަމާގެ މި މައްސަލަ އަކީ މިވަގުތު ނިލަންދޫގައި އޮތް އެންމެ ބޮޑު ކަންބޮޑުވުން ފާހަގަކޮށް އަލީ ވިދާޅުވީ މިކަމުގެ ސަބަބުން ނިލަންދޫގައި ބަލިމަޑުކަން ނުފިލާ ކަމަށެވެ.
