ލަންކާގެ ފުލުހުންނާއި ހަވާލާދީ އެގައުމުގެ ނޫސްތަކުގައި ބުނެފައިވަނީ، މިހާތަނަށް މި ހަމަނުޖެހުން ތަކުގައި ހަތް މީހުން މަރުވެފައި ވާކަން ކަށަވަރު ކުރެވިފައި ވާކަމަށާއި، އޭގެ ތެރޭ އުމުރުން 24 އަހަރުގެ ފުލުސް އޮފިސަރެއްވެސް ހިމެނޭ ކަމަށެވެ.
ފުލުސް މީހާ މަރުވީ، އޭނާއަށް ލިބުނު އަނިޔާތަކަށް ފަރުވާ ދިނުމަށް ހޮސްޕިޓަލަށް ގެނެސް އެޑްމިޓް ކުރި ފަހުން ކަމަށްވެސް ފުލުހުން ވަނީ ބުނެފައެވެ.
މީގެ އިތުރުން ފުލުހުން ބުނީ، މިހާތަނަށް އެގައުމުގައި ހިނގަމުން އަންނަ ހަމަނުޖެހުން ތަކުގައި 220 އަށްވުރެ ގިނަ މީހުންނަށް އެކިވަރުގެ އަނިޔާތައް ވެގެން ހޮސްޕިޓަލުގައި ފަރުވާ ދެމުން އަންނަ ކަމަށެވެ. އަދި ބައެއް މީހުންގެ ހާލު ސީރިއަސް ކަމުން މަރުވާ މީހުންގެ އަދަދު އިތުރުވުމަކީ އެކަށީގެން ވާކަމެއް ކަމަށްވެސް ފުލުހުން ވަނީ ބުނެފައެވެ.
އިއްޔެ މަރުވި މީހުންގެ ތެރޭ އެގައުމުގެ ގާނޫނު ހަދާ މަޖިލީހުގެ މެންބަރު އަމަރަކީތީ އަތުކޮރަލާ ވެސް ހިމެނެއެވެ. އޭނާ މަރުވީ މުޒާހަރާގެ ބައިވެރިންނަށް އަމާޒުކޮށް ބަޑިން ހަމަލާ ދިނުމަށްފަހު ފިލަން ވަން ތަނުން ނުނިކުމެވޭނެ ކަން އެނގުމުން އަމިއްލައަށް ގަޔަށް ބަޑިޖަހައިގެންނެވެ.
ލަންކާގައި ހަމަނުޖެހުން ބޮޑުުވުމުގެ ސަބަބުން އަންނަ ބުދަ ދުވަހާއި ހަމައަށް އެގައުމުގައި ވަނީ ކާފިއު އިއުލާން ކޮށްފައެވެ.
