ޕީޖީ އޮފީހުން ނެރެފައިވާ ބަޔާނެއްގައި ބުނެފައިވަނީ، ޓެރަރިޒަމްގެ ގާނޫނަށް އެންމެ ފަހުން ގެނެވުނު ބަދަލުތައް ނިޔާކުރާގޮތުން، ޓެރަރިޒަމްގެ މައްސަލައެއްގައި، ހާދިސާ ހިނގިފަހުންވެސް ހެކި ލިބިއްޖެނަމަ، އެމައްސަލައެއްގައި ދައުވާ ކުރުމަކަށް ހުރަހެއް ނެތް ކަމަށެވެ.
މިހާރު ވަކި މީހެއްގެ މައްޗަށް ދައުވާއެއް ކުރެވިފައި ނެތުމަކީ، އޭނާގެ މައްޗަށް ފަހުން ލިބޭ ހެއްކެއްގެ މައްޗަށް ދައުވާ ނުކުރޭނެކަމުގެ ހުއްޖަތެއް ނޫން ކަމަށާއި، ރައީސް ނަޝީދުގެ މައްސަލައާ ގުޅިގެން ހައްޔަރު ކުރެވުނު، ނުވަތަ ހައްޔަރު ނުކުރި ނަމަވެސް، އެމައްސަލައިގައި މިހާރު ކުރިއަށްދާ ތަހުގީގުތަކުން ހެކި ލިބޭ ބައެއްގެ މައްޗަށް ލިބޭ ހެކިތަކެއްގެ މައްޗަށް ބަލައި، ދައުވާ ކުރުމާމެދު ގޮތެއް އެ އޮފީހުން ނިންމާނެ ކަމަށްވެސް ބަޔާނުގައި ވަނީ ބުނެފައެވެ.
މީގެ އިތުރުން ބަޔާނުގައި ބުނެފައިވަނީ، ރައީސް ނަޝީދަށް ދިން ބޮމުގެ ހަމަލާގެ މައްސަލައިގެ ތަހުގީގާއި ދައުވާ ކުރުމުގެ ކަންތައް ހިނގަމުން ދިޔައީ، އެކަމަށް ގާނޫނުތަކުގައި ކަނޑައެޅިފައިވާ މުއްދަތުތަކުގެ ތެރޭގައި، ގާނޫނުގައި ކަނޑައަޅައިފައި އޮތް އުސޫލުތަކުގެ ތެރެއިން ކަމަށެވެ.
ރައީސް ނަޝީދަށް ދިން ބޮމުގެ ހަމަލާގެ ތަހުގީގު ކުރިއަށްދާގޮތުގެ ސަބަބުން އެމަނިކުފާނުގެ އާއިލާ އާއި ވަކީލުން ގެންދަވަނީ ކަންބޮޑުވުން ފާޅު ކުރަމުންނެވެ. އަދި މި ހަމަލާއަށް ފަންޑު ކުރި ބަޔަކު ހޯދުމަށްވެސް އެމަނިކުފާނުގެ ފަރާތުން ގެންދަވަނީ ވިދާޅުވަމުންނެވެ.
މި މައްސަލަ އާއި ގުޅިގެން އަދި މިހާތަނަށް ދައުވާ އުފުލާ ހުކުމެއް ކޮށްފައިވަނީ، އަދުހަމް އަހުމަދު ރަޝީދަށް އެކަންޏެވެ. އޭނާ ވަނީ އަތަމާ ޕެލެސް ތެރޭ ހުރެ ރިމޯޓަކުން ބޮން ގޮއްވާލި ކަމަށް ޝަރީއަތުގައި އެއްބަސްވެފައެވެ. އޭނާގެ މައްޗަށް ކުށް ސާބިތުވާކަމަށް ކަނޑައަޅާ ކޯޓުން ވަނީ 25 އަހަރަށް އޭނާ ޖަލު ބަންދު ކުރުމަށް ހުކުމް ކޮށްފައެވެ.
މި މައްސަލަ އާއި ގުޅިގެން ނުވަ މީހެއްގެ މައްޗަށް ދައުވާ އުފުލިއިރު، އޭގެ ތެރެއިން އަށް މީހުން ދައުވާތަކަށް އިންކާރުކުރި ނަމަވެސް މައްސަލަ ސާބިތުވާވަރަށް އެކަށީގެންވާ ހެކި ގަރީނާ ކޯޓަށް ހުށަހަޅާފައިވާނެ ކަމަށް ޕީޖީ އޮފީހުން ވަނީ ބުނެފައެވެ.
