މި މައްސަލަ ޖޭއެސްސީއަށް ހުށަހެޅުއްވީ ކުރީގެ ކުރީގެ ޕޮރޮސެކިއުޓަރ ޖެނެރަލް މުހުތާޒް މުހުސިންގެ އެޑަވަކަސީ ޗެމްބަރގެ ފަރާތުންނެވެ. މައްސަލާގައި ބުނެފައި ވަނީ އެ ހުކުމް ކުރި ލ. އަތޮޅުގެ އިސް މެޖިސްޓްރޭޓް އަލީ ޝަރީފް ފަޑިޔާރެއްގެ މަގާމުގައި ބަހައްޓަން އެކަށީގެން ނުވާފަދަ އަމަލެއް ކޮށްފައިވާ ކަމަށެވެ.
މި ގޮތުން ޝަރީއަތުގެ ކުރީ މަރުހަލާގައި މަސްއޫދު ހިލްމީ އާއި ފާތިމަތު އާސިޔާގެ ހެކިބަސް ބަލައިގެނެވޭނެ ކަމަށް ނިންމާފައިވާ ކަމަށާއި އެހެންނަމަ ވެސް ފަހުމަރުހަލާގައި އެނިންމުން ބަދަލުކޮށްފައިވާ ކަމަށެވެ. އަދި އެއްމަރުހަލާއެއްގައި ނިންމާ ނިންމުންތަކާއި ތައާރުޝުވާ ގޮތަށް އެމައްސަލައެއް ނިންމުމުގެ ބާރު އެމަރުހަލާގެ ކޯޓަކަށް ލިބިގެން ނުވާކަމަށް ޖޭއެސްސީއަށް ހުށަހެޅި މައްސަލައިގައި ބުނެފައިވެއެވެ. މި މައްސަލައިގެ ޝަރީއަތުގެ ކުރިން ހުށަހެޅި ހުށަހެޅުމާއި ގުޅޭ ގޮތުން ނިންމެވި ނިންމެވުމުގައި ބަޔާންކޮށްފައި ވަނީ މައުޝޫޢީ ގަޒިއްޔާގައި ބަލައި، އިސްވެ ބަޔާންކުރެވުނު ދެފަރާތުގެ ހެކިބަސް ރިއާޔަތްކުރެވޭނެ ކަމަށެވެ.
މެޖިސްޓްރޭޓް އަލީ ޝަރީފް ހުކުމް ކުރުމުގައި ހެކިބަސް ބަލައިނުގަތުމާއި ގުޅޭ ގޮތުން ޝަރީއަތުން ފާހަގަކޮށްފައިވާ ދެ ހާލަތަކީ ޝަރީއަތުގެ ކުރިން ހުށަހަޅާ ހުށަހެޅުމާއި މެދު ގޮތް ނިންމި އިރުވެސް ވުޖޫދުގައި އޮތް ހާލަތެއް ކަމަށާއި އަދި ޝަރީއަތުގެ ކުރިން ހުށަހެޅި ހުށަހެޅުމާއި މެދު ގޮތް ނިންމި އިރު، އެ ދެފަރާތުގެ ހެކިބަސް ބަލައިގަތުމަށް ނިންމާފައި ވަނީ އެހާލަތަށް ރިއާޔަތްކުރުމަށް ފަހުގައި ކަން އެނގޭ ކަމަށެވެ.
ދައުލަތުން ހުށަހެޅި ހުރިހާ ހެކިތަކެއްހެން ބޭރުކުރުމަށް ފަހު މައްސަލާގެ ފަހު މަރުހަލާގައި ކުރި ހުކުމުގައި މަސްއޫދާއި އޭނާގެ އަންހެނުންގެ ހެކިބަސް ބަލައި ނުގަންނަށް ޝަރީއަތުން ނިންމާފައި ވަނީ މަސްއޫދަކީ އަނިޔާ ލިބުނުފަރާތް ކަމަށްވެފައި އާސިޔާ އަކީ އޭނާގެ އަންހެނުން ކަމަށް ވާތީ އެވެ.
މި މައްސަލަ ނިންމަވާފައިވަނީ ވަކި ފަރުދެއްގެ މަސްލަހަތަށް ބުރަވެ އަދުލް އިންސާފްގެ ހަމަތަކާއި ހިލާފަށްކަމަށް ސާފުކޮށް އިނގޭ ކަމަށެވެ.
މަސްއޫދަށް ހަމަލާދިން މައްސަލާގައި ދައުލަތުން ދައުވާކޮށްފައި ވަނީ ލ. އަތޮޅުގައި އޮންނަ މަސްއޫދުގެ ކާރު އަންދާލި މައްސަލާގައި ވެސް ފުލުހުން ތަހްގީގް ހިންގަމުންދާ ފޮނަދޫ، ދިލްކުސާގޭ، އަހުމަދު ސަމީމްގެ މައްޗަށެވެ.
