އިންޑިއާގައި ހުންނަ ކެއާ ހޮސްޕިޓަލުން ވަނީ މިދިޔަ ހަފްތާގެ ތެރޭ ކުޑަކުދިންގެ ގަޔަށް މުއްދަތް ހަމަވެފައި ހުރި އައިވީތަކެއް ޖަހާފަ އެވެ.
މި ހާދިސާ ހިނގުމަށް މެދުވެރިވީ އެތަނުގައި ހުންނަ ފާމަސީއަށް އެރި އޮޅުމެއްގެ ސަބަބުން ކަމަށް އެގައުމުގެ ނޫސްތަކުގައި ވަނީ ބުނެފައެވެ. ފާމަސީއިން މުއްދަތް ހަމަވެފައި ހުރި އައިވީތައް ކުދިންގެ ގަޔަށް ޖެހުމަށް ފޮނުވުނީ، އެތަނުގެ ސްޓޮކް ބަލަހައްޓަމުން ދިޔަ ސިސްޓަމަށް ދިމާވި ޓެކްނިކަލް މައްސަލަ އަކުން ކަމަށާއި، އެ އައިވީތަކުގެ މުއްދަތް މިދިޔަ މަހުގެ ކުރީ ކޮޅު ހަމަވިނަމަވެސް ސިސްޓަމުން އެކަން ނުދެއްކީ ކަމަށް ހޮސްޕިޓަލާއި ހަވާލާދީ ނޫސްތަކުގައި ވަނީ ބުނެފަ އެވެ.
މި އައިވީތައް އެ ހޮސްޕިޓަލުގައި ފަރުވާ ހޯދަމުން ދިޔަ 17 ކުއްޖަކަށް ދީފައި ވާއިރު، އޭގެ ތެރެއިން ހާލު ދެރަވެގެން އެއްމާބަނޑު ދެ ކުދިން ވަނީ މަރުވެފަ އެވެ. މީގެ އިތުރުން އެ އައިވީ ޖެހި އެހެން ފަސް ކުއްޖަކަށް ފަރުވާ ދެމުން އަންނަ ކަމަށް ނޫސްތަކުގައި ވަނީ ބުނެފަ އެވެ.
މި މައްސަލަ އާއި ގުޅިގެން އެގައުމުގެ ފުލުހުންނާއި ސިއްހީ ވުޒާރާ ގުޅިގެން އަންނަނީ ތަހުގީގެއް ކުރަމުންނެވެ. އަދި ތަހުގީގަށް ފަހު ފަހަރުގައި ހޮސްޕިޓަލު ބަންދުކުރުން ނުވަތަ ހޮސްޕިޓަލުގެ ފާމަސީ ބަންދުކުރަން ޖެހިދާނެ ކަމަށް އެގައުމުގެ ނޫސްތަކުގައި ވަނީ ބުނެފަ އެވެ.