އެމްއެންޕީން މިއަދު ބޭއްވި ނޫސްވެރިންގެ ބައްދަލުވުމުގައި ކުރި ސުވާލަކަށް ޖަވާބު ދެއްވަމުން ދަނގެތި ދާއިރާގެ ރައްޔިތުންގެ މަޖިލީހުގެ މެމްބަރު ކަންވެސް ކުރައްވަމުން ގެންދަވާ ނާޒިމް ވިދާޅުވީ، ކޮމަންޑޫ ދާއިރާގެ މަޖިލިސް އިންތިހާބުވެސް ސާބިތުވެގެން ދިޔައީ "ޑިސައިޑިން ފެކްޓަ" އަކީ އެމްއެންޕީ ކަން ކަމަށާއި، އިންތިހާބު ދާނީ އެމްއެންޕީން އެޅި ކޮޅަކަށް ކަން ކަމަށެވެ.
އެ ކަމުގެ މިސާލެއްގެ ގޮތުގައި ނާޒިމް ފާހަގަކުރެއްވީ ނިމިގެންދިޔަ އަންހެނުންގެ ތަރައްގީއަށް މަސައްކަތްކުރާ ވިލިގިލީ ދާއިރާގެ ކައުންސިލު އިންތިހާބެވެ.
އެ އިންތިހާބުގައި އެމްއެންޕީ އޮތީ އެންމެ ވޯޓެއްގެ ތަފާތުގައި ކަމަށާއި، ރާއްޖޭގެ ދެވަނައަށް އެންމެ ބޮޑު ޕާޓީއާއިއެކު އެންމެ ވޯޓެއްގެ ފަރަގުގައި ހިފަހައްޓާލުމަކީ ޕާޓީއަށް ލިބުނު ވަރަށް ބޮޑު ކާމިޔާބީއެއް ކަމަށް ނާޒިމް ވިދާޅުވިއެވެ.
އަދި އެކަމުން ދޭހަވަނީ، ޕާޓީއަށް ގިނަ ބަޔެއްގެ ތާއީދު އެބައޮތްކަން ކަމަށާއި، އެމްއެންޕީއަށް ވަނީ "އެންމެ ވޯޓަކާއި ހަމަޔަށް ކައިރިއަށް ދެވިފަ" ކަން ކަމަށެވެ.
ނާޒިމް އިތުރަށް ވިދާޅުވީ ކުރިއަށް އޮތް އިންތިހާބުތަކުގައިވެސް ވާދަކުރާނެ ކަމަށެވެ. އަދި މާތްﷲގެ ރަހުމަތްފުޅާއިއެކު ކާމިޔާބު ވެސް ކުރާނެ ކަމަށެވެ.
އެމްއެންޕީގައި މިވަގުތު 8432 މެމްބަރުން އެބަތިއްބެވެ.
