ކްރިމިނަލް ކޯޓުން އިއްޔެ ކުރި އިއުލާނެއްގައި އެކަން ހާމަކޮށް ބުނެފައިވަނީ ޖޫން މަހުން ފެށިގެން ތިން މަސް ދުވަސް ވަންދެން، ކޮންމެ ދުވަހަކުވެސް މެންދުރު ފަހު ދޭކުން ހަވީރު ފަހަކަށް މައްސަލަތައް ކުރިއަށް ގެންދާނެ ކަމަށެވެ.
މިއަހަރުގެ ކުރީކޮޅު ޖޭއެސްސީން ބުނެފައިވަނީ ކްރިމިނަލް ކޯޓުގެ "ބެކްލޮގް" ހުސްކުރަން 16 އަހަރު ނަގާނެ ކަމަށާއި އެއް އަހަރު ތެރޭގައި އެ މައްސަލަތައް ނިންމޭނެ ގޮތުގެ ޕްލޭނެއް އެކުލަވާލާފައިވާ ކަމަށެވެ. ޝަރީއަތްތައް ލަސްވުމާއި ޝެޑިއުލް ނުކުރާ މައްސަލާގައި ރައްޔިތުންގެ މަޖިލީހުގެ ޖުޑީޝަރީ ކޮމިޓީންވަނީ ޖޭއެސްސީ އާއި ޖުޑީޝަލް އެޑްމިނިސްޓްރޭޝަން ޑިޕާޓްމަންޓް އެ ކޮމިޓީއަށް ހާޒިރުކޮށްފައެވެ.
އޭރު ޖުޑީޝަރީ ކޮމިޓީގައި ވާހަކަ ދައްކަވަމުން ޖޭއެސްސީގެ ރައީސް ހިސާން ހުސެއިން ވިދާޅުވެފައިވަނީ އޭރު ކްރިމިނަލް ކޯޓުގައި ދެހާހަށްވުރެ ގިނަ މައްސަލަ އޮތް ކަމަށާއި އަދި ކޮންމެ އަހަރަކު އެވްރެޖްކޮށް ނުވަ ސަތޭކައެއްހާ މައްސަލަ ކްރިމިނަލް ކޯޓަށް ހުށަހަޅާ ކަމަށެވެ. އޭރު ކްރިމިނަލް ކޯޓުގެ ބެކްލޮގްގައި އެއްހާހަށްވުރެ ގިނަ މައްސަލަ އޮތެވެ.
