އިންޑިޔާ މިލިޓަރީ ސިފައިން ރާއްޖޭގައި ތިބޭ ކަމަށް ބުނެ އިކޮޅު ކޯލިޝަނުން ގެންދަނީ ސިލްސިލާކޮށް މާލޭގައި މުޒާހަރާތައް ކުރަމުންނެވެ.
މުޒާހަރާތަކުން ފުލުހުންގެ އަމުރަށް ނުކިޔަމަންތެރިވެގެން ބައެއް ފަރާތްތަކުން ފުލުހުން ހައްޔަރު ވެސް ކުރެ އެވެ. ނަމަވެސް ފަހުން އެންމެެން ވެސް ދޫކޮށްލާކަން ފާހަގަކުރެވެ އެވެ.
އިދިކޮޅުން ރޭ މާލޭގައި ކުރިއަށް ގެންދިޔަ މުޒާހަރާގެ ތެރެއިން 4 މީހަކު ހައްޔަރުކޮށްފައިވާ ކަމަށް ޕީޕީއެމްގެ ތަރުޖަމާން ހީނާ ވަލީދު ވިދާޅުވި އެވެ. ހިނާ ވިދާޅުވަނީ މުޒާހަރާގެ ތެރެއިން 4 މީހަކު ފުލުހުން ހައްޔަރުކޮށްގެން ގެންދިޔައީ ކަމަށެވެ. ނަމަވެސް ފަހުން އޭގެ ތެރެއިން 2 މީހަކު ރޭ ދަންވަރު ދޫކޮށްލާފައިވާ ކަމަށެވެ.
ހައްޔަރު ކުރި މީހުންނާއި ބެހޭގޮތުން ފުލުހުންގެ މީޑިޔާ އޮފިޝަލް ވިދާޅުވީ ރޭގެ މުޒާހަރާއިން ހައްޔަރުކުރީ ޖުމްލަ 2 މީހުން ކަމަށެވެ. އިތުރު މީހަކު ފުލުހުންގެ ބެލުމުގެދަށަށް ގެނެސްފައިނުވާނެ ކަމަށެވެ.
ސުވާލު އުފެދެނީ ފުލުހުން 4 މީހުން ހައްޔަރު ކުރި ކަމާމެދުގަ އެވެ. ނުވަތަ "ހައްޔަރު" އެ މާނަ ކުރާގޮތަކާ މެދުއެވެ.
މުޒާހަރާ ކުރަން ނުވަތަ އެއްވުމުގެ ތެރެއިން "ފުލުހުންގެ ހައްޔަރުކުރުން" އާންމު އުސޫލުން މާނަ ކުރެވެނީ އެ ތަނެއްގައި ހުއްޓައި އެމީހަކު ފުލުހުންގެ ބެލުމުގެދަށަށް (ވެހިކަލް އަކަށް ނުވަތަ އެހެން ގޮތަކަށް) ވިޔަސް ގެންދާ ހިސާބުންނެވެ.
ފަހަރުގައި ރޭގެ މުޒާހަރާއިން 4 މީހަކު ހަމަ "ހައްޔަރު" ވެސް ކޮށްފާނެ އެވެ. ނަމަވެސް ފުލުހުންގެ "ހައްޔަރު" މާނަ ކުރުމުގެ ކެޓަގަރީއަށް ނުފެތޭތީ ހައްޔަރު ނުކުރަނީ ކަމަށްވެސް ބުނެފާނެ ނޫންތޯއެވެ؟ ކޮންމެއަކަސް މުޒާހަރާއިން ހައްޔަރުކުރި މީހުންގެ ލިސްޓް މިއޮތީ "އޮޅުން އަރާފަ" އެވެ.