ގާނޫނު ނަމްބަރު 3/2006 ދައުލަތުގެ މާލިއްޔަތު ގާނޫނަށް އިސްލާހު ގެނައުމުގެ ބިލަށް އިސްލާހު ގެނައުމަށް ހުށަހެޅީ ރައްޔިތުންގެ މަޖިލީހުގެ ޕީޕީއެމްއަށް ނިސްބަތްވާ މަހިބަދޫ ދާއިރާގެ މެންބަރު އަހުމަދު ތޯރިގެވެ. 

މަޖިލިސް ފަށްޓަވައި ދެއްވައި އެންމެ ފުރަތަމަ ރައީސް ނަޝީދު ވަނީ މި ގާނޫނަށް އިސްލާހު ގެނައުމާމެދު ވާހަކަ ދައްކަވާފަ އެވެ. 

ރައީސް ނަޝީދު ވިދާޅުވީ މާލިއްޔަތު ގާނޫނަށް ރައްޔިތުންގެ މަޖިލީހުން ލިބިދީފައި އޮތް ބާރު ވަޒީރުންގެ މަޖިލީހަށް ޕީޕީއެމް އިން މީގެކުރިން ދީފައިވާ ކަމަށާއި، ހަމަ އެކަން ތަކުރާރުކޮށް ކުރިން އޮތްގޮތަށް ބާއްވަން އަނެއްކާވެސް ޕީޕީއެމް އިން ހުށަހަޅަނީކަމަށެވެ. 

ރައީސް ނަޝީދު ވިދާޅުވީ ދައުލަތުގެ މާލިއްޔަތު ގާނޫނަކީ އެމަނިކުފާނުގެ ހަޔާތާއި ވަރަށް ބޮޑަށް ގުޅިފައިވާ ގާނޫނެއް ކަމަށެވެ. އަދި މާލިއްޔަތު ގާނޫނު އުފެދިގެން މިއަދާއި ހަމައަށް ހުށަހެޅިފައިވާ އިސްލާހުތަށްވެސް މަޖިލީހުގައި ރައީސް ނަޝީދު ހިއްސާކުރެއްވި އެވެ.

ދައުލަތުގެ މާލިއްޔަތުގެ ގާނޫނު 2006 ވަނަ އަހަރު ފުރަތަމަ އަމަލުކުރަން ފެށި އިރު ދައުލަތުގެ ނަމުގައި ދަރަންޏަށް ފައިސާ ނަގަންވާނީ ނުވަތަ ދައުލަތުގެ ނަމުގައި ގެރެންޓީއެއް ދެވޭނީ އެދަރަނި ނެގުމުގެ ސަބަބުން ނުވަތަ ގެރެންޓީއެއް ދިނުމުގެ ސަބަބުން ގައުމުގެ އިގްތިސާދަށާއި ދައުލަތުގެ މާލިއްޔަތަށް ކުރާނެ އަސަރު ދިރާސާ ކުރުމަށްފަހު ފިނޭންސް މިނިސްޓަރު ރައީސުލް ޖުމްހޫރިއްޔާއަށް ހުށަހެޅުމުން އޭރުގެ ގާނޫނުއަސާސީގައިވާ ގޮތުގެ މަތިން ރައީސުލް ޖުމްހޫރިއްޔާ ކަނޑައަޅާ ގޮތެއްގެ މަތިން އަދި އެދަރަންޏެއް ނަގާ ކޮންމެ ފަހަރަކު ނުވަތަ ގެރެންޓީއެއްދޭ ކޮންމެ ފަހަރަކު އެކަމެއް 30 ދުވަހުގެ ތެރޭގައި ފިނޭންސް މިިސްޓަރު ރައްޔިތުންގެ މަޖިލީހަށް ފޮނުވައިގެން އެކަމެއް ފާސްކޮށްގެން ކަމަށެވެ. 

މީގެ އިތުރުން 2010 ވަނަ އަހަރު ގެނައި އިސްލާހުގައި ބުނެފައިވަނީ ދައުލަތުގެ ނަމުގައި ދިވެހި ސަރުކާރުން އެއްވެސް ދަރައްޏެއް ނަގަންވާނީ ނުވަތަ ގެރެންޓީއެއްދޭން ވާނީ މިނިސްޓަރު އެކަމަށް އެދި ރައީސުލް ޖުމްހޫޜިއްޔާއަށް ހުށަހަޅާ އެކަން އެގޮތަށް ކުރަން ރައީސުލް ޖުމްހޫރިއްޔާ ހުއްދަކުރާނަމަ ރައީސުލް ޖުމްހޫރިއްޔާ ރައްޔިތުންގެ މަޖިލީހަށް ހުށައަޅާ އެހުށަހެޅުން މަޖިލީހުގެމެންބަރުންގެ އަގުލަބިއްޔަތުން ފާސްވެގެން ކަމަށެވެ.

2014 ވަނަ އަހަރު މާލިއްޔަތު ގާނޫނަށް ގެނައި 4 ވަނަ އިސްލާހު ގައި ބުނެފައިވަނީ ދައުލަތުގެ ނަމުގައި ދަރަންޏަށް ފައިސާ ނެގުމާއި، ދައުލަތުގެ ނަމުގައި ގެރެންޓީ ދިނުމުގެ އުސޫލު ދައުލަތުގެ މާލިއްޔާތު ގާނޫނުގައި ފުރަތަމަ އޮތް ގޮތަށް ވަނީ ބަދަލުކޮށްފަ އެވެ. އެއީ ރައީސުލްޖުމްހޫރިއްޔާ ކަނޑައަޅާ ގޮތެއްގެ މަތިން ދިވެހި ސަރުކާރުން ގެރެންޓީ ދިނުމާއި ލޯނުނެގުމެވެ. މިހާރުވެސް އަމަލުކުރަމުންދަނީ މިގަވައިދާއި އެއްގޮތަށެވެ.